செங்கல்பட்டு மாவட்டம் மதுராந்தகம் தொகுதி இடைத்தேர்தல் களம் அரசியல் கட்சிகளின் அனல் பறக்கும் பிரச்சாரத்தால் சூடுபிடித்துள்ள நிலையில், இன்று அங்கு நடைபெற்ற பிரச்சாரக் கூட்டத்தில் திமுக தொண்டர்கள் கைகளில் ஏந்திய போஸ்டர்கள் அரசியல் வட்டாரத்தில் பெரும் பரபரப்பை ஏற்படுத்தியுள்ளன.

மதுராந்தகம் தொகுதி இடைத்தேர்தலில் திமுக வேட்பாளரை ஆதரித்துத் பிரச்சாரம் செய்வதற்காகக் கட்சியின் முக்கியத் தலைவரான உதயநிதி ஸ்டாலின் இன்று இப்பகுதிக்கு வருகை தந்து தீவிர வாக்கு சேகரிப்பில் ஈடுபட்டார்.

உதயநிதி ஸ்டாலினின் பிரச்சாரக் களத்தில் திரண்ட திமுக தொண்டர்கள் சிலர், கரூர் சம்பவத்தைக் குறிப்பிடும் வகையில் "1 year of ஓடுகாலி" என்ற வாசகங்கள் அச்சிடப்பட்ட பதாகைகளையும் போஸ்டர்களையும் கைகளில் ஏந்தியபடி தங்களது எதிர்ப்பைப் பதிவு செய்தனர்.

தவெக தலைவர் விஜயைக் குறிக்கும் வகையில் வைக்கப்பட்டிருந்த இந்த விளம்பரப் பதாகைகள் மற்றும் போஸ்டர்களின் புகைப்படங்களும் வீடியோக்களும் தற்போது சமூக வலைதளங்களில் வேகமாகப் பரவி வருகின்றன. இடைத்தேர்தல் களத்தில் இரு தரப்புக்கும் இடையேயான அரசியல் மோதல் இந்தச் சம்பவத்தின் மூலம் மேலும் தீவிரமடைந்துள்ளது.