மத்திய கிழக்கு நாடுகளில் போர் மேகங்கள் சூழ்ந்துள்ள நிலையில், லெபனான் மீது இஸ்ரேல் நடத்தி வரும் தீவிர வான்வழித் தாக்குதலால் அந்த நாட்டின் மக்கள் தொகையில் ஐந்தில் ஒரு பங்கு மக்கள் (சுமார் 10 லட்சம் பேர்) தங்கள் வீடுகளை விட்டு வெளியேறி அகதிகளாகத் தஞ்சம் புகுந்துள்ளனர்.

கடந்த பிப்ரவரி 28, 2026 அன்று அமெரிக்காவும் இஸ்ரேலும் இணைந்து ஈரான் மீது நடத்திய தாக்குதலின் தொடர்ச்சியாக, ஈரானுக்கு ஆதரவான லெபனானின் ஹிஸ்புல்லா அமைப்பு இஸ்ரேல் மீது ஏவுகணைத் தாக்குதல்களை நடத்தியது. இதற்குப் பதிலடியாக, லெபனான் மீது இஸ்ரேல் தனது ராணுவ நடவடிக்கையைத் தீவிரப்படுத்தியுள்ளது.

இஸ்ரேல் பாதுகாப்புப் படையினர் லெபனானின் தெற்குப் பகுதி மற்றும் தலைநகர் பெய்ரூட்டின் தெற்குப் புறநகர்ப் பகுதிகளில் வசிக்கும் மக்களை வெளியேறுமாறு எச்சரிக்கை விடுத்துள்ளனர். லெபனானின் மொத்த மக்கள் தொகையில் 20% மக்கள் தற்போது உள்நாட்டிலேயே அகதிகளாக மாறியுள்ளனர். ஹிஸ்புல்லா அமைப்பின் வலுவான தளங்களாகக் கருதப்படும் ஷியா பிரிவினர் வாழும் பகுதிகளைக் குறிவைத்து இஸ்ரேல் தாக்குதல் நடத்தி வருகிறது. இது லெபனானின் மொத்த பரப்பளவில் சுமார் 15 சதவீதம் ஆகும்.

கடந்த 2024 நவம்பரில் இஸ்ரேல் மற்றும் லெபனான் இடையே தற்காலிகப் போர்நிறுத்த ஒப்பந்தம் ஏற்பட்டு அமைதி நிலவியது. ஆனால், பிப்ரவரி இறுதியில் ஈரான் விவகாரத்தால் மீண்டும் போர் மூண்டது. ஹிஸ்புல்லா அமைப்பின் உள்கட்டமைப்புகள், ஆயுதக் கிடங்குகள் மற்றும் சுரங்கப் பாதைகளை அழிப்பதே தங்களின் நோக்கம் என இஸ்ரேல் தெரிவித்துள்ளது.

ஏற்கனவே சிரியா போன்ற நாடுகளிலிருந்து வந்த அகதிகளால் திணறி வரும் லெபனானுக்கு, தற்போது சொந்த நாட்டு மக்களே அகதிகளாக மாறுவது பெரும் சுமையை ஏற்படுத்தியுள்ளது. உணவு, மருந்து மற்றும் தங்குமிடம் இன்றி லட்சக்கணக்கான மக்கள் தவித்து வருகின்றனர்.