ஈரானில் பயங்கரம்...  வெடிகுண்டு வெடித்ததில் 14 ராணுவ வீரர்கள் உடல் சிதறி பலி!

ஈரான் நாட்டில் முந்தைய வான்வழித் தாக்குதல்களின் போது வெடிக்காமல் மீதமிருந்த வெடிகுண்டுகள் எதிர்பாராத விதமாக வெடித்ததில், அந்நாட்டின் புரட்சிகர காவல்படையைச் சேர்ந்த 14 வீரர்கள் சம்பவ இடத்திலேயே பரிதாபமாக உயிரிழந்தனர். எல்லையோரப் பகுதியில் ரோந்துப் பணியில் ஈடுபட்டிருந்தபோது, மண்ணில் புதைந்திருந்த இந்த வெடிகுண்டுகள் திடீரென வெடித்துச் சிதறியதால் இந்தத் துயரச் சம்பவம் நிகழ்ந்துள்ளது. இந்த கோர விபத்தில் மேலும் பல வீரர்கள் பலத்த காயமடைந்து உயிருக்கு ஆபத்தான நிலையில் மருத்துவமனையில் அனுமதிக்கப்பட்டுள்ளனர்.

சம்பவம் நடந்த இடத்தைச் சுற்றிலும் ராணுவ வீரர்கள் பாதுகாப்பு வளையத்திற்குள் கொண்டு வந்துள்ள நிலையில், அங்கு இன்னும் வெடிக்காத குண்டுகள் ஏதேனும் உள்ளதா என்பது குறித்து தீவிர சோதனைகள் நடத்தப்பட்டு வருகின்றன. உயிரிழந்த வீரர்களின் உடல்கள் மீட்கப்பட்டு ராணுவ மரியாதையுடன் அடக்கம் செய்ய ஏற்பாடுகள் செய்யப்பட்டு வருகின்றன. இந்த விபத்து தற்செயலாக நடந்ததா அல்லது ஏதேனும் சதிவேலைகள் பின்னணியில் உள்ளதா என்ற கோணத்திலும் அந்நாட்டுப் பாதுகாப்புத் துறை அதிகாரிகள் தீவிர விசாரணை மேற்கொண்டு வருகின்றனர்.

ஈரான் மற்றும் அண்டை நாடுகளுக்கு இடையே நிலவி வரும் போர் பதற்றமான சூழலில், ஒரே நேரத்தில் 14 ராணுவ வீரர்கள் உயிரிழந்த சம்பவம் அந்நாட்டில் பெரும் சோகத்தையும் அதிர்ச்சியையும் ஏற்படுத்தியுள்ளது. வெடிகுண்டு வெடித்த சத்தம் பல கிலோமீட்டர் தூரத்திற்கு கேட்டதாக அப்பகுதி மக்கள் பீதியுடன் தெரிவிக்கின்றனர். ஏற்கனவே எல்லையில் போர் மேகங்கள் சூழ்ந்துள்ள நிலையில், இந்த விபத்து ஈரான் ராணுவத்தின் பாதுகாப்பு ஏற்பாடுகள் குறித்த புதிய விவாதங்களை உருவாக்கியுள்ளது.