1970 உலகக் கோப்பை சாம்பியன் பிரேசில் கால்பந்து ஜாம்பவான் 'பிரிட்டோ' காலமானார்!

கால்பந்து உலகின் பொற்காலமாகக் கருதப்படும் 1970-ஆம் ஆண்டு பிபா உலகக் கோப்பையை வென்ற பிரேசில் அணியின் அசைக்க முடியாத நட்சத்திர தற்காப்பு ஆட்டக்காரரான பிரிட்டோ காலமானார். அவருக்கு வயது 86. அவரது மறைவு உலகெங்கிலும் உள்ள கால்பந்து ரசிகர்களிடையே பெரும் சோகத்தை ஏற்படுத்தியுள்ளது.

கடந்த சில நாட்களாகக் கடுமையான நிமோனியா காய்ச்சல் மற்றும் வயது முதிர்வு சார்ந்த உடல்நலக் குறைபாடுகளால் பாதிக்கப்பட்டிருந்த பிரிட்டோ, மருத்துவமனையில் தீவிர சிகிச்சைப் பிரிவில் அனுமதிக்கப்பட்டிருந்தார். எனினும், சிகிச்சை பலனின்றி அவர் இன்று உயிரிழந்ததாக அவரது குடும்பத்தினரும் பிரேசில் கால்பந்து கூட்டமைப்பும் அதிகாரப்பூர்வமாக அறிவித்துள்ளன.

1939-ஆம் ஆண்டு பிறந்த ஹெர்குலிஸ் பிரிட்டோ ரூவாஸ், பிரேசில் கால்பந்து வரலாற்றில் மிகச்சிறந்த டிஃபெண்டர்களில் ஒருவராகப் போற்றப்படுபவர். கடந்த 1964-ஆம் ஆண்டு பிரேசில் தேசிய அணியில் அறிமுகமான அவர், 1972-ஆம் ஆண்டு வரை சர்வதேச கால்பந்து களத்தில் அசுர ஆதிக்கம் செலுத்தினார்.

தேசிய அணிக்காக மொத்தம் 61 சர்வதேசப் போட்டிகளில் விளையாடியுள்ள பிரிட்டோ, அதில் 45 வெற்றிகளையும், 11 டிராக்களையும் பெற்றுத் தந்துள்ளார். இவர் களத்தில் இருந்த போட்டிகளில் பிரேசில் அணி வெறும் 5 ஆட்டங்களில் மட்டுமே தோல்வியைத் தழுவியுள்ளது என்பது அவரது அசாத்திய ஆட்டத்திறனுக்குச் சான்றாகும்.

1970-ஆம் ஆண்டு மெக்ஸிகோவில் நடைபெற்ற உலகக் கோப்பை தொடரில், கால்பந்து ஜாம்பவான் பெலே தலைமையிலான உலகப் புகழ்பெற்ற பிரேசில் அணியில் பிரிட்டோ மிக முக்கியத் தூணாகச் செயல்பட்டார். அந்தத் தொடரின் இறுதிப் போட்டியில் இத்தாலி அணியை 4-1 என்ற கணக்கில் வீழ்த்தி பிரேசில் உலகக் கோப்பையைக் கைப்பற்றிய போது, பிரிட்டோவின் தற்காப்பு ஆட்டம் உலகப் புகழ்பெற்றது. 1966 மற்றும் 1970 என இரண்டு உலகக் கோப்பை தொடர்களில் அவர் பிரேசில் நாட்டைப் பிரதிநிதித்துவப்படுத்தியுள்ளார்.

உள்நாட்டு கிளப் கால்பந்தைப் பொறுத்தவரை வாஸ்கோடகாமா , பொடாஃபோகோ மற்றும் ஃபிளமெங்கோ போன்ற பிரேசிலின் முன்னணி கிளப் அணிகளுக்காக விளையாடிப் பல பட்டங்களை வென்றுள்ளார். பிரிட்டோவின் மறைவிற்குப் பிரேசில் அதிபர், தற்போதைய கால்பந்து நட்சத்திரங்கள் மற்றும் சர்வதேச கால்பந்து கூட்டமைப்பு ஆகியவை தங்களின் ஆழந்த இரங்கல்களைத் தெரிவித்து வருகின்றன.