கன்னியாகுமரி மாவட்டம் ஆரல்வாய்மொழி அருகே உள்ள பொய்கைக் காட்டுப் பகுதியில் வனவிலங்குகளை வேட்டையாட முயன்ற இருவரை வனத்துறையினர் கையும் களவுமாகப் பிடித்துள்ளனர். அவர்களுக்குக் கடுமையான அபராதம் விதிக்கப்பட்டதோடு, சிறையிலும் அடைக்கப்பட்டுள்ளனர்.

ஆரல்வாய்மொழி வனத்துறையினர் பொய்கைக் காட்டுப் பகுதியில் வழக்கமான தீவிர ரோந்துப் பணியில் ஈடுபட்டிருந்தனர். அப்போது சந்தேகத்திற்கிடமான வகையில் பதுங்கியிருந்த இருவரைச் சுற்றி வளைத்துப் பிடித்தனர். விசாரணையில் அவர்கள் பிரகாஷ் (24), ஆரல்வாய்மொழி, சுரேஷ் (40), ஆரல்வாய்மொழியைச் சேர்ந்தவர்கள்  என்பது தெரியவந்தது. இவர்கள் வனவிலங்குகளை வேட்டையாடும் நோக்கில் ஆயுதங்களுடன் பதுங்கியிருந்தது உறுதி செய்யப்பட்டது. கைது செய்யப்பட்டவர்களிடம் இருந்து வேட்டைக்குத் திட்டமிட்டிருந்த அரிவாள், கத்தி உள்ளிட்ட பயங்கர ஆயுதங்களை வனத்துறையினர் பறிமுதல் செய்தனர்.

மாவட்ட வன அலுவலர் மற்றும் வன உயிரினக் காப்பாளர் அன்பு அவர்களின் உத்தரவின் பேரில், 'வன உயிரின பாதுகாப்புச் சட்டத்தின்' கீழ் இவர்கள் மீது வழக்குப் பதிவு செய்யப்பட்டது. வேட்டையாட முயன்ற குற்றத்திற்காக இருவருக்கும் தலா ரூ.1 லட்சம் அபராதம் விதிக்கப்பட்டது. அபராதம் விதிக்கப்பட்டதைத் தொடர்ந்து, இருவரும் வனத்துறை நீதிமன்றத்தில் ஆஜர்படுத்தப்பட்டுச் சிறையில் அடைக்கப்பட்டனர்.

வனப்பகுதிக்குள் அத்துமீறி நுழைபவர்கள் மற்றும் வனவிலங்குகளை வேட்டையாட முயற்சிப்பவர்கள் மீது இரும்புக்கரம் கொண்டு நடவடிக்கை எடுக்கப்படும் என மாவட்ட வனத்துறை கடும் எச்சரிக்கை விடுத்துள்ளது. வனப்பகுதிகளில் கண்காணிப்பு கேமராக்கள் மற்றும் கூடுதல் ரோந்துப் பணிகள் மூலம் பாதுகாப்பு பலப்படுத்தப்பட்டுள்ளதாகவும் தெரிவிக்கப்பட்டுள்ளது.