மத்தியப் பிரதேச மாநிலத்தின் கந்த்வா மற்றும் சத்தர்பூர் மாவட்டங்களில் இரு காவலர்கள் அடுத்தடுத்து தற்கொலை செய்து கொண்ட சம்பவம் பெரும் அதிர்ச்சியை ஏற்படுத்தியுள்ளது. கந்த்வா மாவட்டத்தில் அன்சிங் நர்காவே என்ற காவலர் தனது விடுமுறை நாட்களின் போது தூக்கிட்டுத் தற்கொலை செய்து கொண்டார். ரேவா மாவட்டத்தில் பணியாற்றி வந்த இவர், 5 நாட்கள் விடுப்பில் இருந்தபோது இந்த விபரீத முடிவை எடுத்துள்ளார். அவரது உடல் மீட்கப்பட்டுப் பிரேதப் பரிசோதனைக்காக மருத்துவமனைக்கு அனுப்பி வைக்கப்பட்டுள்ளது.

இதேபோல் சத்தர்பூர் மாவட்டத்திலும் மற்றொரு துயரச் சம்பவம் நிகழ்ந்துள்ளது. அங்குள்ள மூடப்பட்ட போலீஸ் அவுட்போஸ்ட்டில் தருண் காந்தர்வ் என்ற காவலர் தூக்கில் தொங்கிய நிலையில் சடலமாகக் கண்டெடுக்கப்பட்டார். இவர் நவ்கான் காவல் நிலையத்தில் பணியாற்றி வந்தவர் என்பது விசாரணையில் தெரிய வந்துள்ளது. ஒரே நாளில் இரு போலீசார் தற்கொலை செய்து கொண்டது காவல்துறை வட்டாரத்தில் மிகுந்த சோகத்தையும் பரபரப்பையும் ஏற்படுத்தியுள்ளது.

இந்த இரண்டு சம்பவங்கள் குறித்தும் அந்தந்த பகுதி போலீசார் தனித்தனியாக வழக்குப் பதிவு செய்து தீவிர விசாரணை நடத்தி வருகின்றனர். தற்கொலைக்கான காரணம் குறித்துப் பல்வேறு கோணங்களில் விசாரணை நடைபெற்று வரும் நிலையில், குடும்பப் பிரச்சினை அல்லது பணிச்சுமை காரணமாக இந்த முடிவை எடுத்திருக்கலாமா என ஆராயப்பட்டு வருகிறது. காவல்துறையினரின் இத்தகைய மன அழுத்தங்கள் குறித்த விவாதங்கள் மீண்டும் மாநில அளவில் சூடுபிடித்துள்ளன.