தமிழகத்தில் சமீபகாலமாகக் குழந்தைகள் மற்றும் பெண்களுக்கு எதிராக அதிகரித்து வரும் பாலியல் வன்முறைகள் மற்றும் குற்றச் சம்பவங்கள் ஒட்டுமொத்த மனிதநேய மிக்க உள்ளங்களையும் உலுக்கியுள்ள நிலையில், இது குறித்துச் சமூக ஆர்வலரும், 'தயா பவுண்டேஷன்' அமைப்பின் நிறுவனருமான லதா ரஜினிகாந்த் தனது வேதனையை வெளிப்படுத்தியுள்ளார்.

தமிழகத்தில் ஒரே நாளில் 5 குழந்தைகள் வன்கொடுமைக்கு ஆளாக்கப்பட்ட கொடூரச் சம்பவத்தைச் சுட்டிக்காட்டிய லதா ரஜினிகாந்த்,  "நமது எதிர்காலத் தூண்களாகக் கருதப்படும் குழந்தைகள் மீது நிகழ்த்தப்படும் இத்தகைய கொடூரமான பாதிப்புகளுக்குப் பெரியவர்களின் போதிய கண்காணிப்பின்மையும், இந்தச் சமூகத்தின் ஒட்டுமொத்த அலட்சியமுமே மிக முக்கியக் காரணமாகும்.

ஒரு சமுதாயத்தில் ஒரே ஒரு குழந்தை பாதிக்கப்பட்டால் கூட, அது அந்த ஒட்டுமொத்த சமுதாயத்தின் ஆரோக்கியமான வளர்ச்சிக்கும் பாதுகாப்புக்கும் நல்லதல்ல என்பதை நாம் அனைவரும் முதலில் புரிந்து கொள்ள வேண்டும்."

குழந்தைகளுக்கு எதிரான குற்றங்களைத் தடுக்க வேண்டியது வெறும் காவல்துறையின் கடமை மட்டுமல்ல, அது ஒவ்வொரு குடிமகனின் பொறுப்பு என்றும் அவர் வலியுறுத்தியுள்ளார். குழந்தைகள் பாதுகாப்பாக வளர்வதற்கான சூழலை உருவாக்குவதில் பெற்றோர்கள், ஆசிரியர்கள் மற்றும் அண்டை வீட்டார் என அனைவரும் இணைந்து ஒருங்கிணைந்த விழிப்புணர்வுடன் செயல்பட வேண்டியது தற்போதைய அவசரத் தேவையாகும்.