உலகப் பொருளாதாரத்தில் இந்தியாவின் திறமையான மனிதவளத்திற்கான தேவை நாளுக்கு நாள் அதிகரித்து வருகிறது. அந்த வகையில், ஜப்பான் நாட்டில் நிலவி வரும் கடுமையான தொழிலாளர் பற்றாக்குறையைப் போக்க, இந்தியாவின் ஹரியானா மாநிலத்திலிருந்து சுமார் 50,000 இளைஞர்களை அடுத்த 5 ஆண்டுகளில் வேலைவாய்ப்புக்காக ஜப்பானுக்கு அனுப்பும் ஒரு புதிய சர்வதேசத் திட்டம் இறுதி செய்யப்பட்டுள்ளது.

ஜப்பானின் முக்கியத் தொழிற்பேட்டை மாகாணங்களில் ஒன்றான 'புகுவோகா' அரசிடம் இருந்து வந்த வேண்டுகோளின் அடிப்படையில், சண்டிகரில் நடைபெற்ற 'ஹரியானா-புகுவோகா கனெக்ட் 2026' உயர்மட்டக் கூட்டத்தில் இந்தத் திட்டம் முறைப்படி ஏற்றுக்கொள்ளப்பட்டுள்ளது:

80 சதவீத நிறுவனங்களில் பற்றாக்குறை: ஜப்பானின் புகுவோகா மாகாணத்தில் உள்ள செமிகண்டக்டர் , ஆட்டோமொபைல், தகவல் தொழில்நுட்பம் மற்றும் உற்பத்தித் துறைகளில் இயங்கும் சுமார் 80 சதவீத நிறுவனங்கள் தகுதியான தொழில்நுட்பப் பணியாளர்கள் இன்றி கடுமையான தட்டுப்பாட்டைச் சந்தித்து வருகின்றன.

இந்தத் தொழில்நுட்பப் பணியிடங்களை நிரப்புவதற்காக, ஹரியானா மாநிலத்தின் திறன்மிகு மாணவர்கள் மற்றும் இளம் தொழில்நுட்ப வல்லுநர்கள் 50,000 பேருக்கு அடுத்த ஐந்து ஆண்டுகளில் ஜப்பானில் வேலைவாய்ப்பு மற்றும் இன்டர்ன்ஷிப் பயிற்சிகள் வழங்கப்பட உள்ளன. இந்தத் திட்டத்தை வெற்றிகரமாகச் செயல்படுத்துவதற்காக ஹரியானா மாநில அரசு பல்வேறு முன்னோடி நடவடிக்கைகளை மேற்கொண்டுள்ளது.

ஹரியானா இளைஞர்கள் ஜப்பானிய நிறுவனங்களின் பணிச் சூழலுக்கு எளிதில் பழகும் பொருட்டு, அம்மாநிலப் பல்கலைக்கழகங்கள் மற்றும் உயர்கல்வி நிறுவனங்களில் ஜப்பானிய மொழிப் பயிற்சி மற்றும் குறிப்பிட்ட தொழிற்துறை சார்ந்த தொழில்நுட்பக் பாடநெறிகள் பாடத்திட்டமாக அறிமுகப்படுத்தப்பட உள்ளன.

இத்திட்டத்தை முறைப்படுத்தவும், ஜப்பானிய முதலீடுகளை ஈர்க்கவும் 'ஹரியானா சகுரா ஒர்க்கிங் குரூப்' என்ற பிரத்யேகக் குழுவையும், ஜப்பானிய நிறுவனங்களுக்கான உதவி மையத்தையும் ஹரியானா அரசு அமைத்துள்ளது. ஹரியானாவில் வசிக்கும் ஜப்பானிய வல்லுநர்களின் குடும்பங்களுக்காக, புகுவோகா தொழில்நுட்ப நிறுவனத்தின் புதிய வளாகம் ஒன்றை குருகிராமில் (Gurugram) அமைப்பதற்கான ஆலோசனைகளும் இக்கூட்டத்தில் முன்வைக்கப்பட்டுள்ளன.

இந்திய வெளியுறவுத்துறை அமைச்சகத்தின் வெளிநாட்டு ஒத்துழைப்புத் துறை மற்றும் ஹரியானா திறன் வேலைவாய்ப்பு கழகம் ஆகியவை இணைந்து இந்தத் திட்டத்தை முன்னெடுத்து வருகின்றன. கடந்த 2025 ஆம் ஆண்டு ஆகஸ்ட் மாதம் நடைபெற்ற இந்தியா-ஜப்பான் உச்சிமாநாட்டில் இரு நாடுகளுக்கும் இடையே எட்டப்பட்ட மனிதவளப் பரிமாற்ற ஒப்பந்தத்தின் ஒரு முக்கியப் பகுதியாக இந்த 50,000 இளைஞர்களுக்கான சர்வதேச வேலைவாய்ப்புத் திட்டம்  நடைமுறைக்கு வந்துள்ளது குறிப்பிடத்தக்கது.