70 மில்லியன் ஆண்டுகளுக்கு முந்தைய டைனோசர் முட்டை தென் அமெரிக்காவில் கண்டுப்பிடிப்பு... சிதையாமல் இருக்கும் கரு - வியப்பில் விஞ்ஞானிகள் -

சுமார் 70 மில்லியன் ஆண்டுகளுக்கு முன்பு பூமியில் வாழ்ந்த மாமிச உண்ணியான டைனோசர் ஒன்றின் முழுமையான முட்டையை அர்ஜென்டினா நாட்டு விஞ்ஞானிகள் கண்டறிந்துள்ளனர். தென் அமெரிக்க வரலாற்றிலேயே மாமிச உண்ணி வகை டைனோசரின் முட்டை ஒன்று இவ்வளவு முழுமையாகவும், முற்றிலும் பாதுகாப்பாக, சிதையாமலும் கிடைப்பது இதுவே முதல் முறை என்பதால், இது உலகளாவிய அறிவியல் சமூகத்தில் பெரும் வியப்பை ஏற்படுத்தியுள்ளது.

அர்ஜென்டினா இயற்கை அறிவியல் அருங்காட்சியகத்தைச் சேர்ந்த முதுகெலும்புகளின் ஒப்பீட்டு உடற்கூறியல் மற்றும் பரிணாம ஆய்வகத்தின் ஆராய்ச்சியாளர்கள் இந்தக் கண்டுபிடிப்பை நிகழ்த்தியுள்ளனர். முன்னணி பழங்கால ஆராய்ச்சியாளர் ஃபெடெரிகோ அக்னோலின் மற்றும் அவரது சகா மாட்டியாஸ் மோட்டா ஆகியோர் அடங்கிய குழு, அர்ஜென்டினாவின் 'சாலிட்ரல் ஓஜோ டி அகுவா' என்ற பகுதியில் மேற்கொண்ட ஆய்வில் இந்த அபூர்வ முட்டை சிக்கியது.

இந்த முட்டை கிரெட்டேசியஸ் காலத்தின் பிற்பகுதியைச் சேர்ந்தது என மதிப்பிடப்பட்டுள்ளது. இதன் வடிவம் குறித்து ஆராய்ச்சியாளர்கள் சில சுவாரஸ்யமான தகவல்களைப் பகிர்ந்துள்ளனர்: பொதுவாக நீண்ட கழுத்து கொண்ட 'சௌரோபாட்' வகை டைனோசர்களின் முட்டைகள் வட்டமாகவும், தடிமனான ஓடுகளுடனும் இருக்கும். ஆனால், தற்போது கிடைத்துள்ள இந்த முட்டை நவீன பறவைகளின் முட்டையைப் போல நீள்வட்ட வடிவத்தில் உள்ளது.

முட்டை ஓட்டில் உள்ள அசாதாரண அடையாளங்கள், இது நாம் இதுவரை அறிந்திராத ஒரு புதிய மாமிச உண்ணி டைனோசர் இனத்தைச் சேர்ந்ததாக இருக்கலாம் என்ற சந்தேகத்தை எழுப்பியுள்ளது. முதலில் இது 'போனபார்டெனிகஸ்' என்ற சிறிய உள்ளூர் தெரோபாட் இனமாக இருக்கலாம் என்று கருதப்பட்டது, ஆனால் விரிவான ஆய்வுக்குப் பிறகு அது வேறு ஒரு புதிய இனமாக இருக்கவே அதிக வாய்ப்புள்ளதாக அக்னோலின் தெரிவித்துள்ளார்.

இந்தக் கண்டுபிடிப்பின் மிக முக்கியமான அம்சம், அந்த முட்டைக்குள் 70 மில்லியன் ஆண்டுகளுக்கு முந்தைய ஒரு 'டைனோசர் கரு' இருப்பதற்கான வாய்ப்பு இருப்பதே ஆகும். முட்டைக்குள் கருவின் எலும்புக்கூடு இருக்கிறதா என்பதை உறுதி செய்ய, நடப்பு ஆண்டு இறுதிக்குள் மைக்ரோ-சிடி ஸ்கேன் செய்ய ஆராய்ச்சியாளர்கள் திட்டமிட்டுள்ளனர்.

ஒருவேளை முழுமையான கரு இல்லாவிட்டாலும், சிதைந்த நிலையில் உள்ள எலும்புகள் மூலம் அந்த டைனோசரின் சுவாச அமைப்பு, உடல் வளர்ச்சி மற்றும் அதன் உடல் தோரணை குறித்து பல ரகசியங்களை அறிய முடியும். உலகில் மாமிச உண்ணி டைனோசர் கருக்கள் கிடைப்பது மிகவும் அரிதான ஒன்று என்பது குறிப்பிடத்தக்கது.

முட்டை கண்டறியப்பட்ட இடத்திற்கு அருகிலேயே 'ரோகாசரஸ் முனியோசி' என்ற டைட்டனோசரின் புதைபடிவங்களும், சில உடைந்த முட்டை ஓடுகளும் கண்டறியப்பட்டுள்ளன. இது அந்த இடம் டைனோசர்கள் கூடு கட்டி வாழ்ந்த பகுதியாக இருந்திருக்கலாம் என்பதைக் காட்டுகிறது. முட்டையிடும் ஊர்வனவற்றிலிருந்து, கூடுகளைப் பராமரிக்கும் நவீன பறவைகள் எப்படிப் பரிணமித்தன என்பதைப் புரிந்துகொள்ள இது ஒரு முக்கிய பாலமாக அமையும்.

எலும்புக்கூடுகள் மூலமாக அந்த இனத்தின் உடலமைப்பை மட்டுமே அறிய முடியும். ஆனால், கூடுகள் மூலமாக மட்டுமே அந்த டைனோசர்கள் சமூகமாக வாழ்ந்தனவா, அல்லது தங்கள் குஞ்சுகளைப் பராமரிக்கும் 'பாசமான பெற்றோராக' இருந்தனவா போன்ற நடத்தை சார்ந்த தகவல்களை அறிய முடியும். வழக்கமாக இத்தகைய கண்டுபிடிப்புகள் ஆய்வறிக்கையாக வெளியான பிறகே உலகிற்குத் தெரியவரும். ஆனால், 'டிஸ்கவர்' பத்திரிகையின் அறிக்கையின்படி, இந்த ஆய்வு முடிவுகள் நேரடி ஒளிபரப்பின் மூலம் பொதுமக்களுக்கும் சக விஞ்ஞானிகளுக்கும் ஒரே நேரத்தில் பகிரப்பட்டது. இது உடனடி அறிவியல் விவாதங்களுக்கு வழிவகுத்ததுடன், உலகளாவிய ஆர்வத்தையும் தூண்டியுள்ளது.

தென் அமெரிக்காவில் கண்டறியப்பட்டுள்ள இந்த அபூர்வ முட்டை, டைனோசர்களின் ரகசிய உலகைத் திறந்து காட்டும் ஒரு திறவுகோலாகக் கருதப்படுகிறது. இதன் மூலம் 70 மில்லியன் ஆண்டுகளுக்கு முன்பு வேட்டையாடித் திரிந்த கொடூரமான மாமிச உண்ணிகள், தங்கள் குஞ்சுகளை எப்படிப் பாதுகாத்தன என்ற புதிய வரலாறு எழுதப்படலாம்.