சென்னை: தமிழ்நாடு மின்வாரியத்தில் காலியாக உள்ள பணியிடங்களை நிரப்பும் நடவடிக்கையாக, புதிதாக 8,000 கள உதவியாளர்களை நியமிக்க தமிழக அரசு அனுமதி வழங்கியுள்ளது.

எந்த ஆண்டில் எத்தனை பேர் நியமனம்?

திட்டத்தின்படி, முதல் கட்டமாக 2027-ம் ஆண்டில் 5,000 பேரும், அடுத்த கட்டமாக 2028-ம் ஆண்டில் 3,000 பேரும் தேர்வு செய்யப்பட உள்ளனர். இந்தப் பணியிடங்களுக்கான ஆட்சேர்ப்பு தமிழ்நாடு அரசுப் பணியாளர் தேர்வாணையம் (TNPSC) வழியாக நடைபெறும் எனத் தெரிவிக்கப்பட்டுள்ளது.

புதிதாகத் தேர்வு செய்யப்படும் பணியாளர்களுக்கான சம்பளச் செலவு ஆண்டுக்கு ரூ.341.26 கோடியாக இருக்கும் என மின்வாரியத் தலைவர் அரசுக்கு முன்மொழிவு அளித்திருந்தார். அந்தக் கருத்துருவைப் பரிசீலித்த தமிழக அரசு, 8,000 பணியிடங்களை நிரப்புவதற்கு ஒப்புதல் அளித்துள்ளது.

விண்ணப்ப அறிவிப்பு எப்போது?

அரசு அனுமதி வழங்கியுள்ள நிலையில், தேர்வுக்கான அறிவிப்பு, விண்ணப்பிக்கும் தேதிகள், கல்வித் தகுதி, வயது வரம்பு, தேர்வு முறை உள்ளிட்ட விவரங்கள் அதிகாரப்பூர்வ அறிவிப்பில் வெளியாக வேண்டும். எனவே, தற்போது விண்ணப்பங்கள் தொடங்கிவிட்டதாகக் கருதக்கூடாது.

அரசுப் பணிக்குத் தயாராகி வருபவர்கள் TNPSC வெளியிடும் அறிவிப்புகளைக் கவனித்து, தங்களுக்கான தகுதி விவரங்களை உறுதிப்படுத்திக் கொள்ளலாம்.