நாகை மாவட்டம் காடந்தேத்தி கிராமத்தில் திமுகவிலிருந்து விலகி தமிழக வெற்றிக் கழகம் (தவெக) மற்றும் பாஜகவில் இணைந்தவர்களை ஊரை விட்டு ஒதுக்கி வைத்ததாக எழுந்துள்ள புகார் அப்பகுதியில் பெரும் பரபரப்பை ஏற்படுத்தியுள்ளது.

நாகை அருகே உள்ள காடந்தேத்தி கிராமத்தைச் சேர்ந்த சிலர், திமுகவிலிருந்து விலகி நடிகர் விஜய்யின் தமிழக வெற்றிக் கழகத்தில் (தவெக) இணைந்தனர். மேலும் சிலர் பாஜகவிலும் இணைந்து கொண்டனர். அரசியல் கட்சிகள் மாறியதால் ஆத்திரமடைந்த தரப்பினர், தவெக மற்றும் பாஜகவில் இணைந்தவர்களைத் தங்களது கிராமத்தை விட்டு ஒதுக்கி வைத்துள்ளதாகக் குற்றச்சாட்டு எழுந்துள்ளது.

பாதிக்கப்பட்டவர்கள் அளித்துள்ள புகாரின்படி, கிராமத்தில் நடைபெற்ற விநாயகர் கோவில் கும்பாபிஷேக விழாவிற்கு அவர்களைச் சேர்க்கவில்லை என்றும், வீடுகளில் நடைபெறும் விசேஷங்கள் மற்றும் துக்க நிகழ்வுகள் போன்ற எந்தவொரு சமூக நிகழ்வுகளிலும் அவர்களைப் பங்கேற்க விடாமல் ஒதுக்கி வைப்பதாகத் தெரிவிக்கப்பட்டுள்ளது.

தங்களைச் சமூக ரீதியாகப் புறக்கணித்து ஊரை விட்டு ஒதுக்கி வைத்தவர்கள் மீது உரிய நடவடிக்கை எடுக்கக் கோரி, பாதிக்கப்பட்டவர்கள் தரப்பில் காவல்நிலையத்தில் அதிகாரப்பூர்வமாகப் புகார் அளிக்கப்பட்டுள்ளது. இச்சம்பவம் குறித்துக் காவல்துறையினர் விசாரணை நடத்தி வருகின்றனர்.