விருதுநகர் மாவட்டம் ராஜபாளையம் அருகே திருமணப் பத்திரிக்கை மற்றும் கொண்டாட்டங்களுக்காகச் சுமார் 40 உறவினர்களுடன் சென்ற தனியார் சொகுசுப் பேருந்து ஒன்று, ஓட்டுநரின் கட்டுப்பாட்டை இழந்து சாலையோரப் பள்ளத்தில் தலைகீழாகக் கவிழ்ந்து விபத்துக்குள்ளானது. இந்த விபத்தில்  இருவர் சம்பவ இடத்திலேயே துடிதுடித்துப் பரிதாபமாக உயிரிழந்தனர். இந்த கோர விபத்தில் படுகாயமடைந்தவர்களைத் தமிழக அமைச்சர் ஜெகதீஸ்வரி நேரில் சந்தித்து ஆறுதல் கூறியுள்ளார்.

விருதுநகர் மாவட்டத்தைச் சேர்ந்த ஒரே குடும்பத்தைச் சேர்ந்த உறவினர்கள் மற்றும் நண்பர்கள் எனச் சுமார் 40 பேர், தங்களது வீட்டுத் திருமண நிகழ்விற்காகத் தனியார் பேருந்து ஒன்றை வாடகைக்கு எடுத்துக் கொண்டு நேற்று மாலை ராஜபாளையம் நோக்கிப் பயணித்துள்ளனர். பேருந்து ராஜபாளையம் தேசிய நெடுஞ்சாலைப் பகுதியில் சென்றுக் கொண்டிருந்த போது, எதிர்பாராதவிதமாக ஓட்டுநரின் கட்டுப்பாட்டை இழந்து, சாலையோரம் இருந்த பள்ளத்தில் தலைகீழாகக் கவிழ்ந்து விபத்துக்குள்ளானது.

விபத்து நேர்ந்தவுடன் பேருந்திற்குள் இருந்த பயணிகள் அனைவரும் வெளியில் வர முடியாமல் இடிபாடுகளுக்குள் சிக்கி அலறினார்கள். இந்த விபத்தில் பேருந்தின் இடிபாடுகளுக்குள் நசுங்கி இருவர் சம்பவ இடத்திலேயே துடிதுடித்துப் பரிதாபமாக உயிரிழந்தனர்.

விபத்துக் குறித்து தகவலறிந்து சம்பவ இடத்திற்கு விரைந்து வந்த ராஜபாளையம் தீயணைப்புத் துறையினர் மற்றும் போலீசார், பேருந்தின் கண்ணாடிகளை உடைத்து உள்ளே சிக்கியிருந்த மற்ற 38 பயணிகளையும் மீட்டு வெளியே எடுத்தனர். இந்த விபத்தில் படுகாயமடைந்த 20-க்கும் மேற்பட்ட பயணிகள் உடனடியாக ராஜபாளையம் அரசு தலைமை மருத்துவமனை மற்றும் தீவிர சிகிச்சைக்காக மதுரை அரசு இராஜாஜி மருத்துவமனைக்கு அவசரச் சிகிச்சைக்காக அனுப்பி வைக்கப்பட்டனர். விபத்து குறித்துத் தகவலறிந்தவுடன், அமைச்சர் ஜெகதீஸ்வரி, பாதிக்கப்பட்டவர்கள் அனுமதிக்கப்பட்டுள்ள அரசு மருத்துவமனைக்கு நேரில் விரைந்து சென்றார்.

படுகாயமடைந்து தீவிர சிகிச்சைப் பிரிவில் அனுமதிக்கப்பட்டுள்ளவர்களுக்கு அளிக்கப்பட்டு வரும் சிகிச்சைகள் குறித்து தலைமை மருத்துவர்களிடம் கேட்டறிந்த அமைச்சர், அவர்களுக்கு எவ்வித தொய்வுமின்றி உயர்தரச் சிகிச்சை அளிக்கப்படுவதை உறுதி செய்யுமாறு உத்தரவிட்டார். மேலும், விபத்தில் பலியானவர்களின் குடும்பத்தினரை நேரில் சந்தித்துத் தனது ஆழ்ந்த இரங்கலையும், ஆறுதலையும் தெரிவித்தார்.