நடிகை மிருணாளினி ரவி ஆன்மீகப் பேச்சாளர் மகாவிஷ்ணுவை கரம் பிடிக்கிறார்... வைரலாகும் பதிவு!

தமிழ் மற்றும் தெலுங்கு திரையுலகில் நடித்து வரும் நடிகை மிருணாளினி ரவி, தனது நீண்ட நாள் நண்பரும் ஆன்மீக சொற்பொழிவாளருமான மகாவிஷ்ணுவைக் கரம்பிடிக்க உள்ளார். இருவருக்கும் இடையே சமீபத்தில் நிச்சயதார்த்தம் இனிதே நடைபெற்று முடிந்துள்ளது. இந்த மகிழ்ச்சியான செய்தியை நடிகை மிருணாளினி ரவி தங்களது சிறப்புமிக்க தருணத்தின் புகைப்படங்களுடன் சமூக வலைதளங்களில் பகிர்ந்துள்ளார்.

நிச்சயதார்த்தப் புகைப்படங்களைப் பகிர்ந்த மிருணாளினி ரவி, "உன்னை நேசிப்பது என்னை நானே நேசிப்பதைப் போல உணர்கிறேன்" என்று குறிப்பிட்டுள்ளார். ஒவ்வொரு பிறவியிலும், ஒவ்வொரு பிரபஞ்சத்திலும் தான் உன்னையே தேர்ந்தெடுப்பேன் என்றும் அவர் தனது பதிவில் நெகிழ்ச்சியுடன் பதிவிட்டுள்ளார். அதேபோல மகாவிஷ்ணு தனது பதிவில் தங்களது பல ஆண்டுகால நட்பு காதலாக மாறியுள்ளதை அழகாக விவரித்துள்ளார்.

திரையுலகைச் சேர்ந்த பிரபலங்களும், ரசிகர்களும் இந்த ஜோடிக்குத் தங்களது வாழ்த்துகளைத் தொடர்ச்சியாகத் தெரிவித்து வருகின்றனர். சமூக வலைதளங்களில் வைரலாகி வரும் இவர்களது காதல் பயணம் குறித்த செய்தி தற்போது பெரும் பேசுபொருளாகியுள்ளது. இருவரும் விரைவில் தங்கள் திருமண தேதியை அதிகாரப்பூர்வமாக அறிவிப்பார்கள் என்று எதிர்பார்க்கப்படுகிறது.