பரபரப்பான அரசியல் சூழ்நிலையில்  இன்று  அதிமுக எம்.எல்.ஏ.க்கள் கூட்டம்...  !

தமிழக சட்டமன்றத் தேர்தல் முடிவுகள் வெளியாகி, எந்தக் கட்சிக்கும் தனிப்பெரும்பான்மை கிடைக்காத நிலையில், அதிமுக பொதுச்செயலாளர் எடப்பாடி பழனிசாமி தலைமையில் இன்று (மே 9) சென்னையில் முக்கிய ஆலோசனைக் கூட்டம் நடைபெறுகிறது. சென்னை ராயப்பேட்டையில் உள்ள கட்சித் தலைமை அலுவலகத்தில் நடைபெறும் இந்தக் கூட்டத்தில், அதிமுக சார்பில் வெற்றி பெற்றுள்ள அனைத்து சட்டமன்ற உறுப்பினர்களும் கலந்துகொள்ள உள்ளனர். தேர்தலுக்குப் பிந்தைய அரசியல் நகர்வுகள் மற்றும் தற்போதைய ஆட்சி அமைக்கும் சூழல் குறித்து இதில் விரிவாக விவாதிக்கப்பட உள்ளது.

குறிப்பாக, தமிழக வெற்றிக் கழகம் ஆட்சி அமைக்கப் போவதாகக் கூறப்படும் சூழலில், அதிமுக-வின் அடுத்தக்கட்ட நிலைப்பாடு என்னவாக இருக்க வேண்டும் என்பது குறித்து இந்தக் கூட்டத்தில் முக்கிய முடிவுகள் எடுக்கப்படலாம் எனத் தெரிகிறது. மேலும், அமமுக எம்எல்ஏ காமராஜின் ஆதரவு விவகாரம் மற்றும் போலி கடிதப் புகார்கள் தொடர்பாகக் கட்சியில் நிலவும் சலசலப்புகள் குறித்தும் எடப்பாடி பழனிசாமி நிர்வாகிகளுடன் ஆலோசிக்க உள்ளார். கூட்டணிக் கட்சிகளுடன் இணைந்து எதிர்க்கட்சியாகச் செயல்படுவதா அல்லது ஆட்சி அமைக்கும் முயற்சியில் ஏதேனும் திருப்பங்கள் நிகழுமா என்ற எதிர்பார்ப்பு அதிமுக தொண்டர்களிடையே எழுந்துள்ளது.

தேர்தல் முடிவுகளுக்குப் பிறகு அதிமுக-வின் பலம் மற்றும் பலவீனம் குறித்து இந்தக் கூட்டத்தில் ஆய்வுகள் மேற்கொள்ளப்பட உள்ளன. தொண்டர்களின் மனநிலை மற்றும் வரும் காலங்களில் கட்சியை வலுப்படுத்துவதற்கான உத்திகள் குறித்தும் எடப்பாடி பழனிசாமி உரையாற்ற உள்ளார். பதவியேற்பு விழாவில் நிலவும் இழுபறி மற்றும் ஆளுநரின் முடிவுகள் குறித்து அதிமுக தரப்பில் இருந்து இன்று மாலை அதிகாரப்பூர்வ அறிவிப்புகள் வெளியாகலாம் என்பதால், தமிழக அரசியல் களம் தற்போது ராயப்பேட்டையை நோக்கித் திரும்பியுள்ளது.