திருச்செந்தூரைத் தொடர்ந்து திருவண்ணாமலையிலும்  பக்தர்களிடம் லஞ்சம் ... இடைத்தரகர்கள் அராஜகம்!

திருச்செந்தூர் சுப்பிரமணிய சுவாமி கோயிலுக்கு சாதாரண உடையில் ரகசிய ஆய்வுக்குச் சென்ற அறநிலையத்துறை அமைச்சர் ரமேஷின் உதவியாளரிடமே, விரைந்து தரிசனம் செய்து வைப்பதாகக் கூறி அர்ச்சகர் ஒருவர் ரூ.4000 லஞ்சம் வாங்கிய விவகாரம் அண்மையில் பெரும் சர்ச்சையை ஏற்படுத்தியது. இந்த முறைகேடு தொடர்பாக அங்குள்ள அர்ச்சகர் பணி செய்ய தடை விதிக்கப்பட்டதோடு, 2  ஊழியர்கள் பணியிடை நீக்கம் செய்யப்பட்டனர். மேலும் தரிசன டிக்கெட்டில் ரூ.25 லட்சம் மோசடி செய்த விவகாரமும் அம்பலமானதைத் தொடர்ந்து, கோயில் இணை ஆணையர் மற்றும் உதவி ஆணையர் உள்ளிட்ட முக்கிய அதிகாரிகள் அதிரடியாக இடமாற்றம் செய்யப்பட்டனர்.

இந்தச் பரபரப்பு அடங்குவதற்குள், தற்போது திருவண்ணாமலை அண்ணாமலையார் கோயிலிலும் அதே போன்றதொரு மோசடி வெளிச்சத்திற்கு வந்துள்ளது பெரும் அதிர்ச்சியை ஏற்படுத்தியுள்ளது. கடந்த 29ம் தேதி அண்ணாமலையார் கோயிலின் அம்மணி அம்மன் கோபுரம் பகுதியில் கண்காணிப்புப் பணியில் ஈடுபட்டிருந்த கோயில் ஊழியர்கள், அவ்வழியாக வந்த ஆந்திர மாநிலப் பக்தர்களிடம் சந்தேகத்தின் பேரில் விசாரணை நடத்தினர். அப்போது அவர்கள் 5 நபர்கள் விரைவாக சிறப்புத் தரிசனம் செய்வதற்காகத் தங்களை அழைத்து வந்த இடைத்தரகரிடம் தலா ஆயிரம் ரூபாய் வீதம் மொத்தம் ரூ.5000 கொடுத்திருப்பதாகக் கூறி உண்மை நிலவரத்தைப் பொட்டிலடித்தாற்போல் உடைத்துள்ளனர்.

தங்கள் முறைகேடு கையும் களவுமாகப் பிடிபட்டதை உணர்ந்த அந்தப் பேராசை பிடித்த இடைத்தரகர், அங்கிருந்த கண்காணிப்பு ஊழியர்களிடம் சிக்காமல் கண்ணிமைக்கும் நேரத்தில் தலைதெறிக்க ஓடித் தப்பியுள்ளார். இந்நிலையில், இடைத்தரகர் ஓடும் இந்த அதிர்ச்சியூட்டும் சிசிடிவி காட்சிகள் தற்போது சமூக வலைதளங்களில் வெளியாகிப் பொதுமக்களிடையே மிக வேகமாகப் பரவி வைரலாகி வருகின்றன. இந்த அத்துமீறல் விவகாரம் தொடர்பாக அண்ணாமலையார் கோயில் நிர்வாகத்தின் சார்பில் திருவண்ணாமலை டவுன் காவல் நிலையத்தில் முறைப்படி புகார் அளிக்கப்பட்டு, காவல்துறையினர் தீவிர விசாரணை மேற்கொண்டு வருகின்றனர்.