தமிழகத்தில் தவெக ஆட்சிப் பொறுப்பேற்ற சில வாரங்களிலேயே, ஆளும் கட்சிக்கும் பிரதான எதிர்க்கட்சியான அதிமுகவிற்கும் இடையேயான அரசியல் மோதல் தற்போது உச்சக்கட்டத்தை எட்டியுள்ளது.

அதிமுக சட்டமன்ற உறுப்பினர்களைத் தங்களது பக்கம் இழுக்கத் தவெக அரசு "குதிரை பேரத்தில்" ஈடுபட்டு வருவதாகக் கூறி, அதற்கு எதிராக நடவடிக்கை எடுக்கக் கோரி தமிழக ஆளுநரிடம் அதிமுக சார்பில் அதிகாரப்பூர்வமாகப் புகார் மனு அளிக்கப்பட்டுள்ளது ராஜ்பவன் மற்றும் தமிழக அரசியல் வட்டாரத்தில் மிகப்பெரிய பூகம்பத்தைக் கிளப்பியுள்ளது.

தமிழகத்தில் தவெக அரசு தங்களது பலத்தைப் பெருக்கிக் கொள்ள எதிர்க்கட்சி எம்எல்ஏக்களை விலைபேசி வருவதாகப் பரவலான புகார்கள் எழுந்து வந்த நிலையில், அதிமுக கொறடாவும் மூத்த தலைவருமான அக்ரி கிருஷ்ணமூர்த்தி இன்று சென்னை கிண்டியில் உள்ள ஆளுநர் மாளிகைக்குச் சென்று ஆளுநரை நேரில் சந்தித்து அதிரடிப் புகார் மனு ஒன்றை அளித்துள்ளார்.

மனுவை அளித்த பின் செய்தியாளர்களைச் சந்தித்த அக்ரி கிருஷ்ணமூர்த்தி,  "தமிழகத்தில் தவெக அரசு பதவியேற்றது முதலே மக்கள் பணிகளைச் செய்வதை விட்டுவிட்டு, எதிர்க்கட்சியான அதிமுகவின் சட்டமன்ற உறுப்பினர்களைப் பல்வேறு வழிகளில் மிரட்டியும், ஆசை வார்த்தைகளைக் காட்டியும், கோடிக்கணக்கான ரூபாய்க்கு விலைபேசி குதிரை பேரத்தில் ஈடுபட்டு வருகிறது.

அலுவலகமாக மாறிய தலைமைச் செயலகம்: மக்களாட்சி மாண்புகளைக் குலைக்கும் வகையில், தமிழக அரசின் அதிகாரப்பூர்வ தலைமைச் செயலகமே தற்போது தவெக கட்சியின் உள்கட்சி அலுவலகம் போல முழுமையாக மாறிவிட்டது. அரசு அதிகாரத்தைப் பயன்படுத்தி இந்த அராஜகங்கள் அரங்கேற்றப்பட்டு வருகின்றன" என்றார்.

"ஜூலை முதல் வாரத்தில் தவெக அரசின் மிக முக்கிய முதலாவது பட்ஜெட் கூட்டத்தொடர் நடைபெற உள்ளது. இந்தக் கூட்டத்தொடருக்கு முன்னதாகவே, எப்படியாவது அதிமுக எம்எல்ஏக்களைத் தங்களது பக்கம் இழுத்து முடக்கத் தவெக தலைமை சதித் திட்டம் தீட்டியுள்ளது.

இத்தகைய சட்டவிரோத மற்றும் ஜனநாயகப் படுகொலை நடவடிக்கைகளைத் தமிழக ஆளுநர் உடனடியாகத் தடுத்து நிறுத்த வேண்டும். குதிரை பேரத்தில் ஈடுபடும் தவெக அரசு மீது ஆளுநர் தனது சிறப்பு அதிகாரத்தைப் பயன்படுத்தி உரிய சட்ட நடவடிக்கை எடுக்க வேண்டும் என மனுவில் வலியுறுத்தியுள்ளோம்."

முன்னதாக, திமுக சட்டமன்றத் தேர்தல் தோல்விக்கான காரணங்களை ஆராய அமைக்கப்பட்ட குழுவின் அவகாசத்தை ஜூன் 10 வரை நீட்டித்து உள்கட்சி விவகாரங்களில் கவனம் செலுத்தி வரும் வேளையில், தற்போது அதிமுக - தவெக இடையே வெடித்துள்ள இந்த நேரடி "குதிரை பேர" அரசியல் யுத்தம், தமிழகத்தின் தற்போதைய அரசியல் சூழலை மேலும் சூடாக்கியுள்ளது.