அதிமுகவிலிருந்து விலகி அண்மையில் தவெகவில் இணைந்து அமைச்சராகப் பொறுப்பேற்றுள்ள மூத்த தலைவர் கே.ஏ.செங்கோட்டையன், முன்னாள் அமைச்சர்களான சி.விஜயபாஸ்கர் மற்றும் எம்.ஆர்.விஜயபாஸ்கர் ஆகியோரை வரவேற்றுப் பேசியபோது எடப்பாடி பழனிசாமியின் தற்போதைய அதிமுகவை மிகக் கடுமையாகச் சாடினார்.

அதிமுகவின் தற்போதைய உள்கட்சி நிர்வாக முறை மற்றும் அதன் வீழ்ச்சி குறித்துப் பேசிய அமைச்சர் செங்கோட்டையன், கட்சியின் பாரம்பரியம் சிதைக்கப்பட்டு விட்டதாகக் குற்றம் சாட்டினார். "புரட்சித்தலைவர் எம்.ஜி.ஆர் மற்றும் புரட்சித்தலைவி அம்மா ஆகிய ஆளுமைகளின் காலத்தோடே உண்மையான அதிமுக முடிந்துவிட்டது. சாதாரணத் தொண்டர்களுக்கான இயக்கமாக இருந்த அது முற்றிலும் மாறிவிட்டது" என்று குறிப்பிட்டார்.

எடப்பாடி பழனிசாமியின் கட்டுப்பாட்டில் இருக்கும் அதிமுக என்பது ஒரு அரசியல் கட்சியே அல்ல; அது ஒரு சில சுயநலவாதிகளால் நடத்தப்படும் 'கார்ப்பரேட் கம்பெனி' போலச் செயல்பட்டு வருகிறது என்று சாடினார்.

தமிழக வெற்றிக் கழகத்தின் புதிய ஆட்சியைத் தொடக்கத்திலேயே முடக்க நினைக்கும் எதிர்க்கட்சிகளின் திரைமறைவுத் திட்டங்களை அவர் அம்பலப்படுத்தினார். "மக்களால் தேர்ந்தெடுக்கப்பட்ட தவெக அரசை எப்படியாவது கவிழ்க்க வேண்டும் என்பதற்காக, பிரதான எதிரியாக இருந்த திமுகவின் ஆதரவோடு எடப்பாடி பழனிசாமி மீண்டும் முதலமைச்சராக வர ஆசைப்பட்டார். இந்த ரகசியக் கூட்டு என்பது ஒட்டுமொத்த தமிழக மக்களுக்கும், மறைந்த தலைவர்களின் கொள்கைகளுக்கும் இழைக்கப்பட்ட மிகப்பெரிய துரோகம்" என ஆவேசமாகப் பேசினார்.

மேலும், அதிமுகவில் இருந்து தான் அநியாயமாகத் தூக்கி எறியப்பட்ட இக்கட்டான காலகட்டத்தில், தனக்கு உரிய அங்கீகாரமும் மதிப்பும் வழங்கி, தன்பால் தாங்கிக் கொண்ட தவெக தலைமைக்கும், முதலமைச்சர் சி. ஜோசப் விஜய்க்கும் தனது நெஞ்சார்ந்த நன்றியினைத் தெரிவித்துக் கொள்வதாக அமைச்சர் கே.ஏ.செங்கோட்டையன் நெகிழ்ச்சியுடன் குறிப்பிட்டார்.

மாமல்லபுரத்தில் சுமார் 15,000 தொண்டர்கள் முன்னிலையில், முன்னாள் அமைச்சர்கள் மற்றும் தவெக அமைச்சர்கள் இணைந்து அதிமுகவின் தற்போதைய தலைமையைக் கடுமையாக விமர்சித்து வரும் இந்த நிகழ்வுகள், திராவிட அரசியல் களத்தில் ஒரு மிகப்பெரிய மாற்றத்திற்கான தொடக்கமாகப் பார்க்கப்படுகிறது.