தமிழக சட்டமன்றத்தில் பெரும்பான்மையை நிரூபிக்கத் தவெக தலைவர் விஜய் தீவிர முயற்சி மேற்கொண்டு வரும் நிலையில், அதிமுக-வின் முன்னாள் அமைச்சரும் தற்போதைய எம்.எல்.ஏ-வுமான சி.வி.சண்முகம் தலைமையிலான குழுவினர் விஜய்யைச் சந்திக்க இருப்பதாகத் தகவல்கள் வெளியாகியுள்ளன. தனிப்பெரும் கட்சியாக உருவெடுத்துள்ள தவெக-விற்குத் தற்போதைய சூழலில் ஆட்சி அமைக்கச் சில எம்.எல்.ஏ-க்களின் ஆதரவு தேவைப்படுகிறது.

இந்நிலையில் அதிமுக-வின் 4 எம்.எல்.ஏ-க்கள் குழுவுடன் சி.வி.சண்முகம், விஜய்யைச் சந்தித்துப் பேச்சுவார்த்தை நடத்த உள்ளதாகத் தெரிகிறது. திமுக-வை வீழ்த்தி தவெக ஆட்சி அமைப்பதைக் கொள்கை ரீதியாக ஆதரிக்க அதிமுக முன்வந்துள்ளதா அல்லது இது ஒரு தனிப்பட்ட சந்திப்பா என்பது குறித்துப் பலத்த விவாதங்கள் எழுந்துள்ளன.

ஏற்கனவே அதிமுக-வின் சில எம்.எல்.ஏ-க்கள் புதுச்சேரியில் உள்ள ஒரு தனியார் விடுதியில் தங்கியுள்ள நிலையில், அங்கிருந்து நேரடியாகச் சென்னைக்கு வந்து இந்தச் சந்திப்பு நடைபெறலாம் எனக் கூறப்படுகிறது. அதிமுக-வின் ஒரு பகுதியினர் விஜய்க்கு ஆதரவு அளிக்க முன்வந்தால், தவெக அரசு அமைப்பது மிக எளிதாகிவிடும்.

கட்சியின் அதிகாரப்பூர்வ முடிவுக்கு மாறாக இந்தச் சந்திப்பு நடைபெறுகிறதா அல்லது தலைமையின் ஆசியோடு நடக்கிறதா என்பது அதிமுக தொண்டர்களிடையே குழப்பத்தை ஏற்படுத்தியுள்ளது.

நாளை மாலைக்குள் ஆட்சி அமைப்பதற்கான உரிமை கோரப்பட வேண்டும் என்ற நிலையில், சி.வி.சண்முகத்தின் இந்த நகர்வு தமிழக அரசியலில் ஒரு 'மெகா கூட்டணி' உருவாவதற்கான அறிகுறியாகப் பார்க்கப்படுகிறது. ஒருவேளை இந்தச் சந்திப்பு வெற்றியடைந்தால், தமிழகத்தில் விஜய் தலைமையிலான புதிய அமைச்சரவை அமைவதில் இருந்த கடைசி முட்டுக்கட்டையும் நீங்கும்.