விமான எரிபொருள் விலை உயர்வு மற்றும் செயல்பாட்டுச் செலவுகள் அதிகரித்துள்ளதைக் காரணம் காட்டி, ஏர் இந்தியா நிறுவனம் தனது முக்கிய சர்வதேச விமானச் சேவைகளைத் தற்காலிகமாக ரத்து செய்வதாக அறிவித்துள்ளது. ஆகஸ்ட் மாதம் வரை சென்னை உள்ளிட்ட முக்கிய நகரங்களிலிருந்து இயக்கப்படும் சர்வதேச சேவைகள் பாதிக்கப்பட்டுள்ளன.

சென்னை - சிங்கப்பூர், டெல்லி - நியூயார்க், டெல்லி - சிகாகோ, மும்பை - நியூயார்க் ஆகிய வழித்தடங்களில் விமானச் சேவைகள் நிறுத்தி வைக்கப்படுவதால், வெளிநாடுகளுக்குச் செல்லத் திட்டமிட்டிருந்த பயணிகள் பெரும் சிரமத்திற்கு ஆளாகியுள்ளனர். விமானச் சேவைகள் ரத்து செய்யப்பட்டதால் பாதிக்கப்பட்ட பயணிகளுக்கு ஏர் இந்தியா நிறுவனம் சில சலுகைகளை அறிவித்துள்ளது.

ரத்து செய்யப்பட்ட விமானங்களில் ஏற்கனவே பயணச்சீட்டு முன்பதிவு செய்தவர்களுக்கு, அவர்கள் செலுத்திய முழுத் தொகையும் திரும்ப வழங்கப்படும் என உறுதி அளிக்கப்பட்டுள்ளது. பயணிகள் விரும்பினால், வேறு தேதிகளில் அல்லது மாற்று வழித்தடங்களில் பயணம் செய்ய முன்னுரிமை வழங்கப்படும் என்றும் தகவல்கள் தெரிவிக்கின்றன.

மத்திய அரசு சமீபத்தில் தங்கம், வெள்ளி போன்ற உலோகங்கள் மீதான இறக்குமதி வரியை உயர்த்தியதைத் தொடர்ந்து, எரிபொருள் விலையிலும் ஏற்பட்டுள்ள இந்த மாற்றம் விமானப் போக்குவரத்துத் துறையைப் பெரிதும் பாதித்துள்ளது. செயல்பாட்டுச் செலவுகளைச் சமாளிக்க முடியாமல் பல விமான நிறுவனங்கள் கட்டணத்தை உயர்த்தியுள்ள நிலையில், ஏர் இந்தியா சேவைகளையே ரத்து செய்யும் நிலைக்குத் தள்ளப்பட்டுள்ளது.