கார் பந்தயத்தில் 2-வது இடம் பிடித்து அசத்திய நடிகர் அஜித் அணி - இந்திய தேசியக் கொடியை ஏந்தி உற்சாகம்!

தமிழ் திரையுலகின் முன்னணி நட்சத்திரமான நடிகர் அஜித்குமார், நடிப்புத் துறையைத் தாண்டி கார் பந்தயத்திலும் சர்வதேச அளவில் புதிய மைல்கற்களை எட்டி வருகிறார். பெல்ஜியத்தில் உள்ள புகழ்பெற்ற 'ஸ்பா-பிரான்கோசாம்ப்ஸ்'ஓடுதளத்தில் நடைபெற்ற 24 மணி நேர ஜிடி3 ப்ரோ-ம்   கார் பந்தயத்தில், அஜித்குமாரின் 'அஜித்குமார் ரேசிங்' அணி 2-வது இடத்தைப் பிடித்து வரலாற்றுச் சாதனை படைத்துள்ளது. உலகத்தரம் வாய்ந்த பல வீரர்களுடன் போட்டியிட்டு, இந்த இக்கட்டான பந்தயத்தில் அவர் பதக்கம் வென்றது ஒட்டுமொத்த இந்தியாவிற்கும் பெருமை சேர்த்துள்ளது.

பந்தயத்தின் முடிவில் வெற்றி மேடையில் ஏறிய அஜித்குமார், தனது குழுவினருடன் இணைந்து இந்தியத் தேசியக் கொடியைத் உயர்த்திப் பிடித்துத் தனது மகிழ்ச்சியைக் கொண்டாடினார். இது தொடர்பான வீடியோக்கள் மற்றும் புகைப்படங்கள் தற்போது சமூக வலைதளங்களில் காட்டுத்தீ போலப் பரவி வருகின்றன. 53 வயதிலும் தளராத வேகத்துடன் அவர் காட்டிய இந்தப் பங்களிப்பு, "சாதனைக்கு வயது ஒரு தடையல்ல" என்பதை மீண்டும் ஒருமுறை நிரூபித்துள்ளது. ஏற்கனவே துபாய் மற்றும் இத்தாலியில் நடைபெற்ற பந்தயங்களில் 3-வது இடத்தைப் பிடித்திருந்த நிலையில், தற்போது பெல்ஜியத்தில் 2-வது இடத்தைப் பிடித்துத் தனது தரத்தை அவர் உயர்த்தியுள்ளார்.

சமீபத்தில் வெளியாகி வசூல் சாதனை படைத்த 'குட் பேட் அக்லி' படத்தின் வெற்றியைத் தொடர்ந்து, அஜித் தற்போது கார் பந்தயங்களில் தீவிர கவனம் செலுத்தி வருகிறார். 2026-ம் ஆண்டிற்கான அவரது பந்தய அட்டவணையில் பிரான்ஸ், ஜெர்மனி, இத்தாலி மற்றும் இங்கிலாந்து உள்ளிட்ட பல்வேறு நாடுகளில் நடைபெறவுள்ள போட்டிகள் இடம்பெற்றுள்ளன. தனது சினிமா வாழ்க்கையின் பரபரப்புகளுக்கு இடையிலும், நாட்டின் புகழை உலக அரங்கில் உயர்த்தி வரும் 'ஏ.கே.'-வின் இந்தச் சாதனையை அவரது ரசிகர்கள் மட்டுமின்றி திரைத்துறையினரும் சமூக வலைதளங்களில் பாராட்டித் தள்ளி வருகின்றனர்.