தமிழ் சினிமாவின் முன்னணி நட்சத்திரமான அஜித்குமாரின் தாயார் மோகினிமணி (84) வயது மூப்பு மற்றும் உடல்நலக் குறைவு காரணமாக நேற்று காலமானார். திரைத்துறையினரும், ரசிகர்களும் இரங்கல் தெரிவித்து, அஞ்சலி செலுத்திய நிலையில், நடிகர் அஜித்குமாரும், அவரது சகோதரர்களும் இணைந்து வெளியிட்டுள்ள அதிகாரப்பூர்வக் கூட்டறிக்கை சமூக வலைத்தளங்களில் வெளியாகியுள்ளது.

மறைந்த மோகினிமணியின் உடல் சென்னை பாலவாக்கத்தில் உள்ள அஜித்குமாரின் இல்லத்தில் அஞ்சலிக்காக வைக்கப்பட்ட நிலையில், தாயாரின் மறைவு குறித்து அஜித்குமார், அனில்குமார், அனூப்குமார் ஆகிய மூன்று சகோதரர்களும் இணைந்து விடுத்துள்ள செய்திக்குறிப்பில், "எங்களது தாயார் மோகினிமணி மறைந்த செய்தியை ஆழ்ந்த துயரத்துடன் பகிர்ந்து கொள்கிறோம்.

எங்களது இந்தத் துயரமான நேரத்தில் எங்களது தனியுரிமைக்கு மதிப்பளிக்குமாறு அனைவரையும் கேட்டுக் கொள்கிறோம். மே 31ம் தேதி காலை சென்னை பாலவாக்கம் இல்லத்தில் நடைபெறும் இறுதிச் சடங்குகள் அனைத்தும் முற்றிலும் தனிப்பட்ட நிகழ்வாக மட்டுமே இருக்கும். இதில் குடும்ப உறுப்பினர்கள் மற்றும் மிக நெருங்கிய உறவினர்கள் மட்டுமே கலந்து கொள்ள உள்ளனர்" என்று குறிப்பிட்டுள்ளனர்.

அஜித்குமாரின் தாயார் மறைந்த செய்தி வெளியான சில நிமிடங்களிலேயே எக்ஸ் (ட்விட்டர்) மற்றும் முகநூல் பக்கங்களில் #RIPMohiniManiAmma என்ற ஹேஷ்டேக் தேசிய அளவில் ட்ரெண்டாகத் தொடங்கியுள்ளது: அஜித்குமாரின் இந்த ஈடுசெய்ய முடியாத துயரமான நேரத்தில், தமிழ்நாட்டின் பல்வேறு பகுதிகளில் இருந்தும் அவரது ரசிகர்கள் மற்றும் சமூக ஆர்வலர்கள் தங்களது ஆழ்ந்த இரங்கல்களைத் தெரிவித்து வருகின்றனர்.

அஜித்தின் வேண்டுகோளுக்கு இணங்க இறுதிச் சடங்கு நடைபெறும் இல்லத்திற்கு நேரில் சென்று கூட்ட நெரிசலை ஏற்படுத்தாமல், சமூக வலைத்தளங்கள் வாயிலாகவே தங்களது அஞ்சலியைச் செலுத்தி வருகின்றனர்.

திரையுலகைச் சேர்ந்த பல முன்னணி நடிகர்கள், இயக்குநர்கள் மற்றும் தயாரிப்பாளர்களும் அஜித்குமார் மற்றும் அவரது குடும்பத்தினருக்குத் தங்களது ஆறுதல்களைத் தெரிவித்து வருகின்றனர்.