தமிழ் திரையுலகில் முன்னணி நடிகர்களின் திரைப்படங்களுக்குப் பாடல்களை எழுதியவரும், ஆன்மீகப் பக்திப் பாடல்களின் மூலம் மக்கள் மத்தியில் நீங்கா இடம் பிடித்தவருமான பிரபல பாடலாசிரியர் கிருதியா உடல்நலக் குறைவால் காலமானார். அவரது மறைவு திரையுலகினர் மத்தியில் பெரும் சோகத்தை ஏற்படுத்தியுள்ளது.

பாடலாசிரியர் கிருதியா தமிழ் சினிமா உலகில் முன்னணி இயக்குநர்கள் மற்றும் இசையமைப்பாளர்களுடன் இணைந்து பல வெற்றிப் பாடல்களைத் தந்துள்ளார். இவரது வரிகளில் வெளியான 'துள்ளித் திரிந்த காலம்' திரைப்படத்தின் பாடல்கள் இளைஞர்கள் மத்தியில் பெரும் வரவேற்பைப் பெற்றன.

இயக்குநர் பி.வாசு இயக்கத்தில், நடிகர் அஜித் குமார் நடிப்பில் வெளியான 'பரமசிவன்' திரைப்படத்திலும் இவர் பாடல்களை எழுதியுள்ளார் என்பது குறிப்பிடத்தக்கது. திரைப்படப் பாடல்களைத் தாண்டி, பக்தி இலக்கிய உலகில் பாடலாசிரியர் கிருதியாவின் பங்களிப்பு அளப்பரியது. இவர் எழுதிய ஏராளமான ஆன்மீகப் பாடல்கள் பட்டிதொட்டியெங்கும் பிரசித்தி பெற்றவை.

குறிப்பாக, இவர் எழுதி உருவான 'ஒன்பது கோளும் ஒன்றாய் காண பிள்ளையார்பட்டி வரவேண்டும்' என்ற பக்திப் பாடல், இன்றளவும் தமிழ்நாட்டின் அனைத்து விநாயகர் ஆலயங்களிலும், ஆன்மீக வழிபாட்டுத் தலங்களிலும் தினமும் காலையில் ஒலித்துக் கொண்டிருக்கும் ஒரு காலப் பெட்டகமாகத் திகழ்கிறது.

மக்களின் மனங்களில் தனது எளிய மற்றும் ஆழமான வரிகளால் வாழ்ந்து வரும் பாடலாசிரியர் கிருதியாவின் மறைவுக்குத் திரைத்துறையினரும், ரசிகர்களும் தங்களது ஆழ்ந்த இரங்கலைத் தெரிவித்து வருகின்றனர்.