தீவிர புயலாக மாறும் அக்வான்... சென்னை உட்பட 4 மாவட்டங்களில் கனமழை எச்சரிக்கை!

 

வங்கக்கடலில் நிலைகொண்டுள்ள காற்றழுத்தத் தாழ்வு மண்டலம் புயலாக மாறிய நிலையில், மேற்கு மத்திய வங்கக்கடல் பகுதியில் இன்று தீவிரப் புயலாகவும் வலுப்பெறக்கூடும் என்று சென்னை வானிலை ஆய்வு மையம் எச்சரித்துள்ளது.

'அக்வான்' எனப் பெயரிடப்பட்டுள்ள இந்தப் புயலின் எதிரொலியாகத் தமிழகத்தின் பல்வேறு மாவட்டங்களில் பலத்த மழை பெய்யக்கூடும் என அறிவிக்கப்பட்டுள்ளது.

நாளை நவம்பர் 17ம் தேதி புயல் தாக்கத்தின் தொடக்கமாக சென்னை, செங்கல்பட்டு மற்றும் திருவள்ளூர் மாவட்டங்களில் ஒரு சில இடங்களில் கனமழை பெய்ய வாய்ப்புள்ளது.

நவம்பர் 18 ம் தேதி  புயலின் தாக்கம் தீவிரமடையும் என்பதால், சென்னைக்கு 'ஆரஞ்சு எச்சரிக்கை' விடுக்கப்பட்டுள்ளது. மேலும், திருவள்ளூர், செங்கல்பட்டு மற்றும் ராணிப்பேட்டை மாவட்டங்களின் சில பகுதிகளிலும் மிக கனமழை பெய்யக்கூடும்.

நவம்பர் 19ம் தேதி காஞ்சிபுரம், திருவண்ணாமலை, விழுப்புரம், கடலூர் மற்றும் மயிலாடுதுறை மாவட்டங்களில் பரவலாகக் கனமழை பெய்ய வாய்ப்புள்ளது.

நவம்பர் 20ம் தேதி மழை நீடிக்கும் என்பதால், சென்னை, திருவள்ளூர் மற்றும் செங்கல்பட்டு மாவட்டங்களின் சில இடங்களில் தொடர்ந்து கனமழை பெய்யக்கூடும் என வானிலை ஆய்வு மையம் தெரிவித்துள்ளது.

புயல் கரையை அடையும் திசை மற்றும் தீவிரத்தைப் பொறுத்து மழையின் அளவு மாறுபடலாம் என்பதால், பொதுமக்கள் அனைவரும் எச்சரிக்கையுடன் இருக்குமாறு அறிவுறுத்தப்படுகிறார்கள்.