அமெரிக்க வரலாற்றில் முதன்முறையாக அதிபர் டிரம்ப் படம் போட்ட புதிய பாஸ்போர்ட்!  

அமெரிக்க நாட்டின் 250 ஆவது சுதந்திர தின விழா வரவிருக்கும் சூழலில் அந்நாட்டு அரசு ஒரு முக்கிய அறிவிப்பை வெளியிட்டுள்ளது. இதைக் கொண்டாடும் வகையில் அதிபர் டொனால்ட் டிரம்ப் தனது படம் அச்சிடப்பட்ட புதிய கடவுச்சீட்டை அறிமுகம் செய்துள்ளார். அமெரிக்க வரலாற்றிலேயே பதவியில் இருக்கும் ஒரு அதிபரின் உருவப்படம் கடவுச்சீட்டில் இடம் பெறுவது இதுவே முதல் முறை என அந்நாட்டு வெளியுறவுத்துறை தெரிவித்துள்ளது. தேசப்பற்று மிக்க இந்த புதிய வடிவமைப்பு மக்கள் மத்தியில் பெரும் வரவேற்பையும் விவாதத்தையும் ஏற்படுத்தியுள்ளது.

வெள்ளை மாளிகை இந்த புதிய ஆவணத்திற்குத் தேசபக்த கடவுச்சீட்டு எனப் பெயரிட்டுள்ளது. இதன் உள்பக்கத்தில் டொனால்ட் டிரம்ப் அமெரிக்க அதிபரின் அதிகாரப்பூர்வ மேசையின் அருகே நிற்பது போன்ற படம் அச்சிடப்பட்டுள்ளது. அத்துடன் அமெரிக்காவின் சுதந்திரப் பிரகடன உரையின் சில முக்கிய வரிகளும் அவரது கையொப்பமும் அதில் இடம் பெற்றுள்ளன. மற்றொரு பக்கத்தில் அமெரிக்காவை உருவாக்கிய முன்னோடிகள் சுதந்திரப் பிரகடனத்தில் கையெழுத்திடும் வரலாற்றுப் புகழ்பெற்ற ஓவியமும் அச்சிடப்பட்டு நேர்த்தியாக வடிவமைக்கப்பட்டுள்ளது.

இந்தக் கடவுச்சீட்டின் பின் பக்க அட்டையில் தங்கம் கலந்த வண்ணத்தில் புதிய கொடி ஒன்றின் சின்னமும் பொறிக்கப்பட்டுள்ளது. வரும் ஜூலை 6 ஆம் தேதி முதல் வாஷிங்டன் நகரில் உள்ள தலைமை அலுவலகத்தில் விண்ணப்பிக்கும் மக்களுக்கு இந்த சிறப்பு ஆவணம் வழங்கப்படும் என அறிவிக்கப்பட்டுள்ளது. குறிப்பிட்ட எண்ணிக்கையில் மட்டுமே அச்சிடப்பட்டுள்ள இந்த கடவுச்சீட்டு தேவைப்படுபவர்கள் நேரடியாகச் சென்று பெற்றுக் கொள்ளலாம். சாதாரண கடவுச்சீட்டு தேவைப்படுவோர் எவ்வித மாற்றமும் இன்றி இணையம் வழியாக எப்போதும் போல விண்ணப்பித்துக் கொள்ளலாம் என்றும் கூறப்பட்டுள்ளது.