"தாமதமான நடவடிக்கை என்றாலும் சரியான முடிவு" - தவெக அரசுக்கு அன்புமணி பாராட்டு!

காவிரி நதிநீர் விவகாரத்தில் தமிழ்நாட்டிற்கு உரிய தண்ணீரைப் பெறுவதற்காக உச்சநீதிமன்றத்தில் வழக்குத் தொடரத் தமிழக அரசு எடுத்திருக்கும் முடிவை பாமக தலைவர் டாக்டர் அன்புமணி ராமதாஸ் வரவேற்றுப் பாராட்டியுள்ளார்.

காவிரி உரிமைகளை மீட்கத் தமிழக அரசு உச்சநீதிமன்றத்தை அணுகும் முடிவு சற்று தாமதமானது என்றாலும், தற்போதைய சூழலில் அதுவே சரியான நடவடிக்கையாகும்.

காவிரி விவகாரத்தில் மத்திய அரசும், கர்நாடக அரசும் இணைந்து செயல்படுத்தும் கூட்டுச் சதியை முறியடிக்கும் வகையில், உரிய தரவுகள் மற்றும் ஆதாரங்களுடன் வழக்குத் தொடர வேண்டும்.

பேச்சுவார்த்தை என்ற பெயரில் நேரத்தை வீணடிக்காமல், சட்டரீதியிலான போராட்டத்தின் மூலமே தமிழ்நாட்டின் நதிநீர் உரிமைகளை முழுமையாக மீட்டெடுக்கத் தமிழக அரசு நடவடிக்கை எடுக்க வேண்டும்.