மத்திய கிழக்கில் ஈரான் மற்றும் அமெரிக்கா இடையிலான அமைதிப் பேச்சுவார்த்தை தோல்வியடைந்ததைத் தொடர்ந்து, உலகப் பொருளாதாரத்தின் முக்கிய வழித்தடமான ஹார்முஸ் நீரிணையை (Strait of Hormuz) உடனடியாகத் திறக்க வேண்டும் எனத் தென்கிழக்கு ஆசிய நாடுகளின் கூட்டமைப்பான ஆசியான் (ASEAN) வலியுறுத்தியுள்ளது.

மத்திய கிழக்கில் நிலவும் போர்ச் சூழல் மற்றும் அதன் தாக்கங்கள் குறித்து ஆய்வு செய்ய, ஆசியான் நாடுகளின் வெளியுறவு அமைச்சர்கள் நேற்று காணொலி வாயிலாக இரண்டாவது அவசர மாநாட்டை நடத்தினர்.

பாகிஸ்தானில் நடைபெற்ற ஈரான் - அமெரிக்கா இடையிலான வார இறுதிப் பேச்சுவார்த்தையில் எவ்வித உடன்பாடும் எட்டப்படவில்லை. இதன் விளைவாக, அமெரிக்கா ஈரானியத் துறைமுகங்களுக்கு எதிராகக் கடல்வழித் தடையை அறிவித்துள்ளது.

ஏற்கனவே ஈரானியப் புரட்சிகரப் படை ஹார்முஸ் நீரிணையை மூடுவதாக அறிவித்திருந்த நிலையில், தற்போது நீரிணையின் போக்குவரத்து முழுமையாகப் பாதிக்கப்பட்டுள்ளது. உலகளாவிய எரிசக்தி விநியோகத்தில் இது பெரும் பாதிப்பை ஏற்படுத்தியுள்ளது.

சர்வதேச விதிகளின்படி ஹார்முஸ் நீரிணையில் கப்பல் மற்றும் வான்வழிப் போக்குவரத்து தடையின்றித் தொடர வேண்டும். பொதுமக்களின் பாதுகாப்பு மற்றும் உள்கட்டமைப்புகளைக் கருத்தில் கொண்டு, ஏற்கனவே அறிவிக்கப்பட்ட தற்காலிகப் போர் நிறுத்தத்தை முழுமையாகச் செயல்படுத்த வேண்டும்.

அனைத்து நாடுகளும் தங்களின் கருத்து வேறுபாடுகளைத் தூதரக ரீதியாகத் தீர்க்க வேண்டும் என்றும், மற்ற நாடுகளின் இறையாண்மையை மதிக்க வேண்டும் என்றும் தீர்மானம் நிறைவேற்றப்பட்டது.

உலகளவில் கொண்டு செல்லப்படும் கச்சா எண்ணெய்யில் சுமார் 20-30% இந்த ஹார்முஸ் நீரிணை வழியாகவே பயணிக்கிறது. இது மூடப்பட்டால் பெட்ரோல், டீசல் விலை உலகெங்கும் வரலாறு காணாத வகையில் உயரக்கூடும் என்பதால் ஆசியான் நாடுகள் இக்கோரிக்கையை முன்வைத்துள்ளன.

மத்திய கிழக்கு பிராந்தியத்தில் அமைதியை நிலைநாட்டப் பாகிஸ்தான் மற்றும் பிற நாடுகள் எடுத்து வரும் முயற்சிகளுக்கு ஆசியான் தனது ஆதரவைத் தெரிவித்துள்ளது.