உஷார்... செல்போன் செயலியில் வலைவீசிய இளம்பெண்... 4 இளைஞர்களுக்கு நேர்ந்த கொடூரம்!

சமூக வலைதளங்கள் மற்றும் மொபைல் செயலிகள் மூலம் அறிமுகமாகும் நபர்களிடம் எவ்வளவு எச்சரிக்கையாக இருக்க வேண்டும் என்பதற்கு மற்றுமொரு சான்றாக கரூர் வேலாயுதம்பாளையத்தில் இந்த அதிர்ச்சிச் சம்பவம் நடந்துள்ளது. 'பிரண்ட் சாட்' செயலி மூலம் இன்ஜினியரிங் பட்டதாரி ஒருவரை ஏமாற்றி, நகை மற்றும் பணத்தைப் பறித்த கும்பல் தற்போது சிக்கியுள்ளது.

சிவகங்கை மாவட்டம் திருப்பத்தூரைச் சேர்ந்தவர் தினேஷ் (34). இன்ஜினியரிங் பட்டதாரியான இவர், தற்போது டீக்கடை நடத்தி வருகிறார். இவருக்கு 'பிரண்ட் சாட்' செயலி மூலம் கரூரைச் சேர்ந்த காயத்ரி (28) என்ற பெண்ணுடன் பழக்கம் ஏற்பட்டுள்ளது. கடந்த ஒரு மாதமாக இருவரும் வாட்ஸ்அப் மூலம் பேசி வந்துள்ளனர்.

காயத்ரி, தனது மூன்றாவது கணவர் கார்த்தி மற்றும் நண்பர்களுடன் சேர்ந்து தினேஷை ஏமாற்றத் திட்டமிட்டுள்ளார். இதற்காக வேலாயுதம்பாளையம் பகுதியில் ஒரு வீட்டை வாடகைக்கு எடுத்துத் தங்கியுள்ளனர்.

காயத்ரியின் அழைப்பை நம்பி தினேஷ் கரூருக்குச் சென்றுள்ளார். காயத்ரி தங்கியிருந்த வீட்டிற்கு தினேஷ் சென்றபோது, அங்கு மறைந்திருந்த கார்த்தி, சஞ்சய் மற்றும் சூர்யா ஆகிய மூவரும் கத்தி மற்றும் அரிவாளைக் காட்டி தினேஷை மிரட்டியுள்ளனர். அவரிடமிருந்த 2.5 பவுன் தங்கச் செயின், 1 பவுன் மோதிரம் மற்றும் ₹1,000 பணத்தை அந்த கும்பல் பறித்துக்கொண்டது.

பின்னர் அவரை ஆட்டோவில் கடத்திச் சென்று, இதைப் பற்றி வெளியே சொன்னால் கொன்றுவிடுவோம் என மிரட்டி வழியிலேயே இறக்கிவிட்டுத் தப்பிச் சென்றனர். பாதிக்கப்பட்ட தினேஷ் அளித்த புகாரின் பேரில், வேலாயுதம்பாளையம் போலீசார் சிசிடிவி காட்சிகளை ஆய்வு செய்தனர். விசாரணையில் இந்த கும்பல் பசுபதிபாளையம் பகுதியைச் சேர்ந்தவர்கள் என்பது உறுதி செய்யப்பட்டது.

காயத்ரி (28), கார்த்தி (29) - காயத்ரியின் 3-வது கணவர், சஞ்சய் (19), சூர்யா (19) ஆகிய கைது செய்யப்பட்ட நான்கு பேர்களிடமிருந்து நகைகள் பறிமுதல் செய்யப்பட்டன. நீதிமன்ற உத்தரவின்படி, ஆண்கள் மூவரும் திருச்சி மத்திய சிறையிலும், காயத்ரி பெண்கள் சிறையிலும் அடைக்கப்பட்டனர்.

சமூக வலைதளங்களில் அறிமுகமாகும் நபர்களை நேரில் சந்திக்கும்போது பொதுமக்கள் மிகுந்த கவனத்துடன் இருக்க வேண்டும்: முன்பின் தெரியாத நபர்கள் அழைக்கும் இடங்களுக்குத் தனியாகச் செல்வதைத் தவிர்க்கவும். இத்தகைய சந்திப்புகளுக்குச் செல்லும் முன் நண்பர்கள் அல்லது உறவினர்களிடம் இடத்தைப் பற்றிய தகவலைப் பகிரவும்.

செயலிகள்: 'சாட்' செயலிகளில் பகிரப்படும் புகைப்படங்கள் மற்றும் தகவல்கள் உண்மையானவை தானா என்பதை உறுதிப்படுத்துவது அவசியம்.