பொதுவாக 50 வயதைக் கடந்தவர்களுக்கே அதிகம் ஏற்படும் என்று கருதப்பட்ட வயிற்றுப் புற்றுநோய் (கேஸ்ட்ரிக் கேன்சர்), தற்போது 20 முதல் 40 வயதுக்குட்பட்ட இளம் வயதினரிடையே மிக வேகமாக அதிகரித்து வருவதாக அதிர்ச்சியூட்டும் மருத்துவ ஆய்வு முடிவுகள் எச்சரிக்கின்றன. இந்த அபாயகரமான நோய்த் தாக்கத்திற்கு இளைஞர்களின் தற்போதைய தவறான உணவு முறைகளும், நவீன வாழ்வியல் மாற்றங்களுமே முதன்மைக் காரணம் என மருத்துவர்கள் சுட்டிக்காட்டுகின்றனர்.

வயிற்றுப் புற்றுநோயைத் தூண்டும் 3 முக்கிய உணவுப் பழக்கங்கள் என தெரிவிக்கப்பட்டுள்ளது. செரிமான மண்டலத்தின் மிக முக்கியப் பகுதியான வயிற்றின் உட்புறச் சுவர்களைப் பாதித்து, புற்றுநோய் செல்களை உருவாக்கும் முதன்மையான உணவுகள்  எவை என்று தெரிஞ்சுக்கோங்க. 

நீண்ட நாள்கள் கெட்டுப்போகாமல் இருப்பதற்காக வேதிப்பொருட்கள் (பிரிசர்வேட்டிவ்ஸ்) சேர்க்கப்பட்ட பாக்கெட் உணவுகள், பதப்படுத்தப்பட்ட இறைச்சிகள் (சாசேஜ், பன்றி இறைச்சி) ஆகியவற்றைத் தொடர்ந்து சாப்பிடுவது வயிற்றின் அமிலச் சமநிலையைக் குலைக்கிறது. அடுத்ததாக அதிகப்படியான ரீஃபைண்ட் ஆயில், அஜினோமோட்டோ மற்றும் செயற்கை நிறமிகள் சேர்க்கப்படும் துரித உணவுகள் மற்றும் மைதா சார்ந்த உணவுகள் குடல் ஆரோக்கியத்தைப் பெருமளவு பாதிக்கின்றன.

அளவுக்கு அதிகமான காரம் மற்றும் ஊறுகாய், கருவாடு போன்ற நாள்பட்ட உப்புத்தன்மை கொண்ட உணவுகளைத் தொடர்ந்து உட்கொள்ளும்போது, அவை வயிற்றின் மென்மையான சவ்வுப் படலத்தை (மியூகோசா) அரித்துத் தீராத புண்களை (அல்சர்) ஏற்படுத்துகின்றன. இந்த நாள்பட்ட புண்களே காலப்போக்கில் புற்றுநோயாக மாறுகின்றன.

உணவு முறைகளைத் தாண்டி, இன்றைய இளைஞர்களின் அன்றாடப் பழக்கவழக்கங்களும் இந்த புற்றுநோய் பாதிப்பிற்கு முக்கியக் காரணியாக அமைகின்றன. வேலைப்பளு மற்றும் தனிப்பட்ட காரணங்களால் ஏற்படும் மன அழுத்தம், வயிற்றில் சுரக்கும் செரிமான அமிலங்களின் அளவை சீரற்றதாக்கி, குடல் சுவர்களைப் பலவீனப்படுத்துகிறது.

இரவு நேரப் பணி மற்றும் அதிகப்படியான மொபைல் போன் பயன்பாட்டால் தூக்கம் கெடுவதால், உடலின் இயற்கையான நோய் எதிர்ப்புத் திறன் மற்றும் செல்களைப் புதுப்பிக்கும் சுழற்சி (சர்க்காடியன் ரிதம்) முற்றிலும் பாதிக்கப்படுகிறது.

மது அருந்துதல் மற்றும் சிகரெட் புகைப்பது குடல் மற்றும் வயிற்றுப் பகுதியில் நச்சுக்களை (கார்சினோஜென்ஸ்) நேரடியாகச் சேர்த்து, புற்றுநோய் செல்கள் உருவாவதற்கான வாய்ப்பை பல மடங்கு உயர்த்துகிறது.

அசுத்தமான குடிநீர் மற்றும் சுகாதாரமற்ற உணவுகள் மூலம் பரவும் இந்த பாக்டீரியா தொற்று, நீண்ட நாள்கள் வயிற்றில் தங்கியிருந்து புற்றுநோயை உருவாக்குகிறது.

ஆரம்பகட்ட அறிகுறிகளும் தடுக்கும் வழிகளும்
தொடர் நெஞ்செரிச்சல், காரணமின்றி உடல் எடை குறைதல், பசியின்மை, அடிக்கடி ஏற்படும் வயிற்று வலி மற்றும் வாந்தி போன்ற அறிகுறிகள் இருந்தால் அலட்சியப்படுத்தாமல் மருத்துவ ஆலோசனையைப் பெற வேண்டும். இதனைத் தவிர்க்க, இளைஞர்கள் தங்களின் அன்றாட உணவில் நார்ச்சத்து மிகுந்த கீரைகள், புதிய காய்கறிகள், பழங்கள் மற்றும் நவதானியங்களை அதிகளவில் சேர்த்துக் கொள்ள வேண்டும். மேலும், தினமும் போதிய அளவு தூக்கம், உடற்பயிற்சி மற்றும் மன அமைதிக்குத் தியானம் போன்ற ஆரோக்கியமான வாழ்வியலை மேற்கொள்வதன் மூலம் இந்த கொடிய நோயிலிருந்து தங்களை முழுமையாகப் பாதுகாத்துக் கொள்ள முடியும் என்று புற்றுநோய் நிபுணர்கள் அறிவுறுத்துகிறார்கள்.