அமெரிக்காவிலிருந்து உள்நாடு மற்றும் வெளிநாடுகளுக்குப் புறப்படவிருந்த அனைத்து விமான சேவைகளும் திடீரெனத் தற்காலிகமாக நிறுத்தப்பட்டுள்ளதாக அமெரிக்க விமானப் போக்குவரத்து நிர்வாகமான ஃபெடரல் ஏவியேஷன் அட்மினிஸ்ட்ரேஷன் அறிவித்துள்ளது. விமானங்களைத் தொடர்புகொள்ளும் தகவல் தொடர்பு அமைப்பில் ஏற்பட்ட திடீர் கோளாறு மற்றும் பயணிகளின் பாதுகாப்பு காரணங்களே இந்த அவசர நடவடிக்கைக்குக் காரணமாகத் தெரிவிக்கப்பட்டுள்ளது.

அமெரிக்காவின் விமானப் போக்குவரத்துக் கட்டுப்பாட்டு அமைப்பில் ஏற்பட்ட தொழில்நுட்பச் சிக்கல் காரணமாக நாடு முழுவதும் உள்ள விமான நிலையங்களில் பெரும் பரபரப்பு ஏற்பட்டுள்ளது. விமானங்களுக்கும் கட்டுப்பாட்டு அறைக்கும் இடையிலான தகவல் தொடர்பு அமைப்பில் ஏற்பட்ட திடீர் கோளாறைத் தொடர்ந்து, முன்னெச்சரிக்கை நடவடிக்கையாக அமெரிக்காவிலிருந்து புறப்படும் அனைத்து விமானங்களும் உடனடியாக நிறுத்தி வைக்கப்பட்டுள்ளன.

தொழில்நுட்பக் கோளாறு முழுமையாகச் சரிசெய்யப்பட்டு, விமானப் போக்குவரத்துப் பாதுகாப்பு உறுதி செய்யப்படும் வரை இந்தத் தற்காலிகத் தடை அமலில் இருக்கும் என ஃபெடரல் ஏவியேஷன் அட்மினிஸ்ட்ரேஷன்  விளக்கமளித்துள்ளது.

அமெரிக்காவிலிருந்து புறப்படும் விமானங்கள் நிறுத்தப்பட்டுள்ள நிலையில், வெளிநாடுகளில் இருந்து அமெரிக்கா நோக்கி வந்து கொண்டிருக்கும் விமானங்கள் மற்றும் வானில் பறந்து கொண்டிருக்கும் விமானங்கள் தேவைக்கேற்ப அருகிலுள்ள விமான நிலையங்களில் பாதுகாப்பாகத் தரையிறங்க அறிவுறுத்தப்பட்டுள்ளன.

திடீரென அறிவிக்கப்பட்ட இந்த விமான சேவை நிறுத்தத்தால் அமெரிக்காவின் முக்கிய விமான நிலையங்களில் ஆயிரக்கணக்கான பயணிகள் தங்களது பயணத்தைத் தொடர முடியாமல் காத்திருக்கும் நிலை ஏற்பட்டுள்ளது. தொழில்நுட்ப வல்லுநர்கள் போர்க்கால அடிப்படையில் தகவல் தொடர்பு அமைப்பில் ஏற்பட்ட கோளாறைச் சரிசெய்யும் பணியில் தீவிரமாக ஈடுபட்டுள்ளனர்.