மேற்கு வங்க மாநில சட்டமன்றத் தேர்தல் வாக்கு எண்ணிக்கையில் பாரதிய ஜனதா கட்சி அமோக முன்னிலை பெற்று வெற்றியை நோக்கிச் சென்று கொண்டிருக்கிறது. இந்த மகிழ்ச்சியான தருணத்தை பாஜக தொண்டர்கள் மற்றும் நிர்வாகிகள் மாநிலம் முழுவதும் உற்சாகமாகக் கொண்டாடி வருகின்றனர். குறிப்பாக, காலிகட் பகுதியில் உள்ள பாஜகவினர் பொதுமக்களுக்குச் சிக்கன் பிரியாணி வழங்கி தங்களது தேர்தல் வெற்றியை மிக விமரிசையாகக் கொண்டாடி மகிழ்ந்தனர்.

இந்த பிரியாணி விருந்து அரசியல் ரீதியாக ஒரு முக்கியப் பதிலடியாகப் பார்க்கப்படுகிறது. தேர்தல் பரப்புரையின் போது, "மேற்கு வங்கத்தில் பாஜக ஆட்சிக்கு வந்தால் அசைவ உணவுகளுக்குத் தடை விதித்துவிடுவார்கள்" என முதலமைச்சர் மம்தா பானர்ஜி தொடர்ச்சியாகக் குற்றம் சாட்டி வந்தார். இந்நிலையில், தாங்கள் முன்னிலை பெற்ற உடனே அசைவ விருந்து வைத்ததன் மூலம், மம்தாவின் புகார்களுக்கு பாஜகவினர் செயல்வடிவில் பதிலடி கொடுத்துள்ளனர்.

தற்போதைய நிலவரப்படி பாஜக கூட்டணி பெரும்பான்மைக்குத் தேவையான இடங்களை விட அதிக இடங்களில் முன்னிலையில் இருப்பதால், அக்கட்சித் தொண்டர்கள் மிகுந்த உத்வேகத்துடன் உள்ளனர். மம்தா பானர்ஜியின் கோட்டையாகக் கருதப்படும் பகுதிகளிலேயே பாஜகவினர் அசைவ விருந்து வைத்துத் தங்களது ஆதிக்கத்தை நிலைநாட்டி வருவது தேர்தல் களத்தில் பெரும் சுவாரஸ்யத்தை ஏற்படுத்தியுள்ளது. வாக்கு எண்ணிக்கை இறுதி நிலையை நெருங்கி வரும் சூழலில், மேற்கு வங்கத்தின் பல்வேறு இடங்களிலும் இத்தகைய வெற்றிக் கொண்டாட்டங்கள் களைகட்டியுள்ளன.