ரஷ்ய எண்ணெய் கொள்முதலைக் குறைக்கும் பாரத் பெட்ரோலியம்... ?!
இந்தியாவின் பொதுத்துறை எண்ணெய் சுத்திகரிப்பு நிறுவனமான பாரத் பெட்ரோலியம் கார்ப்பரேஷன் லிமிடெட் (BPCL), நவம்பர் மாதத்தில் ரஷ்யாவிலிருந்து வாங்கும் கச்சா எண்ணெயின் அளவைக் குறைக்கும் என எதிர்பார்க்கப்படுகிறது.
ரஷ்ய எண்ணெயைக் கொண்டு வருவதற்கான கப்பல் போக்குவரத்துச் செலவு அதிகரித்துள்ளதுடன், மத்திய கிழக்கு நாடுகளிலிருந்து கிடைக்கும் எண்ணெய் விலை ரீதியாகச் சாதகமாக இருப்பதும் இதற்குக் காரணங்களாகக் கூறப்படுகின்றன. இதுகுறித்து நிறுவனத்தின் நிதிப் பிரிவு இயக்குநர் வெட்ஸா ராமகிருஷ்ண குப்தா, காலாண்டு முடிவுகள் தொடர்பான ஆலோசனைக் கூட்டத்தில் தெரிவித்துள்ளார்.
ஜூலை முதல் செப்டம்பர் வரையிலான காலாண்டில், BPCL கொள்முதல் செய்த கச்சா எண்ணெயில் ரஷ்யாவின் பங்கு சுமார் 37 சதவீதமாக இருந்தது. வரும் மாதங்களில் எண்ணெய் கொள்முதல் எந்த அளவுக்கு மாறும் என்பது விலை மற்றும் போக்குவரத்துச் செலவுகளைப் பொறுத்திருக்கும்.