பாமக நிறுவனர் மருத்துவர் ராமதாஸ் மற்றும் அவரது மகனும் பாமக தலைவருமான மருத்துவர் அன்புமணி ராமதாஸ் ஆகியோருக்கு இடையே கடந்த ஓராண்டாக நிலவி வந்ததாகக் கூறப்பட்ட அரசியல் மற்றும் குடும்ப மோதல் போக்கு முற்றிலுமாக முடிவுக்கு வந்துள்ளது. விழுப்புரம் மாவட்டம் தைலாபுரம் தோட்டத்தில் உள்ள ராமதாஸின் இல்லத்தில் இன்று நடைபெற்ற இச்சந்திப்பு, பாமகவினர் மற்றும் தமிழக அரசியல் வட்டாரத்தில் பெரும் நெகிழ்ச்சியையும் பேசுபொருளையும் ஏற்படுத்தியுள்ளது.

கடந்த சில மாதங்களாகக் கட்சி சார்ந்த முடிவுகள் மற்றும் குடும்ப விவகாரங்களில் தந்தைக்கும் மகனுக்கும் இடையே கருத்து வேறுபாடுகள் இருந்து வந்ததாக அரசியல் வட்டாரங்களில் பரவலாகப் பேசப்பட்டது. இந்நிலையில், இன்று தைலாபுரம் தோட்ட இல்லத்திற்குத் தனது குடும்பத்தினருடன் அன்புமணி ராமதாஸ் நேரில் சென்றார்.

நீண்ட நாட்களுக்குப் பிறகு தனது தந்தையை நேரில் சந்தித்த அன்புமணி, கடந்த காலக் கசப்புகளை மறந்து தந்தை ராமதாஸைக் கட்டியணைத்துக் கண்ணீர் விட்டு அழுததாகத் தைலாபுரம் தோட்ட வட்டாரங்கள் தெரிவிக்கின்றன. பின்னர், தனது மனைவியுடன் இணைந்து தந்தை ராமதாஸின் காலில் விழுந்து அவர் ஆசி பெற்றார்.

இந்த நெகிழ்ச்சியான சந்திப்பின் போது அன்புமணி ராமதாஸின் மகள்கள், மருமகன்கள் மற்றும் அவரது பேரன், பேத்திகள் என ஒட்டுமொத்தக் குடும்பத்தினரும் தைலாபுரம் இல்லத்தில் ஒன்றுகூடினர்.

ராமதாஸின் காலில் விழுந்து அன்புமணியின் பேரன், பேத்திகள் வாழ்த்து பெற்ற பொழுது, ராமதாஸ் அவர்களை மனமகிழ்ந்து வாழ்த்தியுள்ளார். இந்தத் திடீர் சந்திப்பு மற்றும் குடும்ப ஒற்றுமையின் மூலம் பாமகவிற்குள் கடந்த ஓராண்டாக நிலவி வந்த உட்கட்சிப் பூசல்களும், ஊகங்களும் முற்றுப்புள்ளிக்கு வந்துள்ளன.

தந்தை - மகன் இடையே ஏற்பட்ட இந்தத் திடீர் சமரசம் மற்றும் பாசப் பிணைப்பு, தொண்டர்கள் மத்தியில் பெரும் உற்சாகத்தை ஏற்படுத்தியுள்ளது. வரவிருக்கும் அரசியல் களங்களை ஒருங்கிணைந்து எதிர்கொள்ள இந்த ஒற்றுமை பாமகவிற்குப் புதிய பலத்தைத் தரும் என அக்கட்சியின் மூத்த நிர்வாகிகள் நம்பிக்கை தெரிவித்துள்ளனர்.