சாலையோர மரத்தில் மோதிய அரசுப் பேருந்து... அலறி கூச்சலிட்ட பயணிகள்!  

கோவையில் இருந்து திருப்பூர் நோக்கி நேற்று காலை அரசு பேருந்து ஒன்று 55 பயணிகளுடன் புறப்பட்டுச் சென்று கொண்டிருந்தது. தேனி மாவட்டம் பெரியகுளத்தைச் சேர்ந்த ஜெயராஜ் என்ற ஓட்டுநர் இப்பேருந்தை இயக்க, பாண்டியன் நகரைச் சேர்ந்த சண்முகம் என்பவர் நடத்துனராகப் பணியில் இருந்தார். இந்த அரசு பேருந்து பல்லடம் முதல் திருப்பூர் செல்லும் முக்கிய சாலையில் அதிவேகமாக வந்துகொண்டிருந்த போது திடீரென இந்த விபத்து நேரிட்டது.

பேருந்து அங்குள்ள மகாலட்சுமி நகர் பேருந்து நிறுத்தம் அருகே வந்தபோது, அதன் முன்னால் சென்று கொண்டிருந்த ஒரு கார் எதிர்பாராத விதமாகத் திடீரென பிரேக் போட்டு நின்றது. இதனால் காரின் பின்புறத்தில் பேருந்து பயங்கரமாக மோதிவிடக் கூடாது என்ற   எண்ணத்தில், ஓட்டுநர் ஜெயராஜ் பேருந்தை உடனடியாக இடதுபுறமாகத் திருப்ப தீவிரமாக முயன்றுள்ளார். அப்போது ஓட்டுநரின் கட்டுப்பாட்டை இழந்த அந்த அரசு பேருந்து, சாலையோரத்தில் இருந்த ஒரு பெரிய மரத்தின் மீது நேராக மோதி நின்றது.

இந்த  விபத்தில் பேருந்தின் முன் பகுதி சேதமடைந்த போதிலும், அதிர்ஷ்டவசமாக உள்ளே இருந்த 55 பயணிகளும் எந்தவிதக் காயமுமின்றி பத்திரமாக உயிர் தப்பினர். இதனைத் தொடர்ந்து சம்பவ இடத்திற்கு விரைந்து வந்த பல்லடம் தீயணைப்பு படை வீரர்கள் மரத்தில் மோதி நின்ற பேருந்தை மீட்டதோடு, மாற்றுப் பேருந்து மூலம் பயணிகள் அனைவரும் திருப்பூருக்கு அனுப்பி வைக்கப்பட்டனர். இச்சம்பவம் குறித்து பல்லடம் போலீசார் வழக்குப் பதிவு செய்து தீவிர விசாரணை நடத்தி வருகின்றனர்.