நஷ்டத்தைச் சமாளிக்க புதிய திட்டம்... 1,000 அரசு பேருந்துகளில் பார்சல் சேவை அறிமுகம்!

தமிழகம் முழுவதும் மொத்தமாக 8   அரசு போக்குவரத்து கழகங்கள் சார்பில் தினமும் 21,515 பேருந்துகள் இயக்கப்பட்டு வருகின்றன. தமிழக அரசு அண்மையில் வெளியிட்ட வெள்ளை அறிக்கையில், அரசு போக்குவரத்து கழகங்களுக்கு 43,865 கோடி ரூபாய் கடன் இருப்பதாகத் தெரிவிக்கப்பட்டுள்ளது. இதனையடுத்துப் பேருந்துக் கட்டணத்தை உயர்த்தாமல் இதர வழிகளில் வருவாயைப் பெருக்க அரசு போக்குவரத்து துறை தீவிர ஆலோசனைகளை மேற்கொண்டது. இதன் ஒரு பகுதியாகப் புதிய வருவாய் ஈட்டும் திட்டங்களை உடனடியாகச் செயல்படுத்தப் போக்குவரத்து துறை முடிவு செய்துள்ளது.

அதன் தொடர்ச்சியாக முதற்கட்டமாகச் சென்னை உட்பட முக்கிய நகரங்களை இணைக்கும் 1,000 அரசு விரைவுப் பேருந்துகளில் பார்சல் வசதி ஏற்படுத்தப்படவுள்ளது. பயணிகள் தங்களின் பயணத்தின் போது கையில் எடுத்துச் செல்ல முடியாத பெரிய பொருட்கள் மற்றும் சுமைகளைப் பார்சல் என முன்பதிவு செய்து எடுத்துச் செல்லலாம். இதற்காகப் புதிய பேருந்துகளின் பின்பகுதியில் பிரத்யேகமாக இடம் ஒதுக்கீடு செய்யப்பட உள்ளது. அத்துடன், அதற்கான கட்டணமும் நியாயமான முறையில் நிர்ணயிக்கப்பட உள்ளது. இந்த புதிய வசதியுடன் கூடிய பேருந்துகளைப் போக்குவரத்து துறை அமைச்சர் பார்த்திபன் நேரில் பார்வையிட்டு ஆய்வு செய்தார்.

மேலும் அரசு போக்குவரத்து கழகங்களில் காலியாக உள்ள இடங்களைத் தனியாருக்கு நீண்ட காலத்திற்குக் குத்தகைக்கு விடுவது போன்ற பல்வேறு முயற்சிகளும் திட்டமிடப்பட்டுள்ளன. பஸ் நிலையங்களில் வணிக வளாகங்கள் அமைப்பது மற்றும் சூரியசக்தி மின் உற்பத்தி திட்டங்களைச் செயல்படுத்துவது உள்ளிட்ட நடவடிக்கைகளும் பரிசீலிக்கப்பட்டு வருகின்றன. இந்த திட்டங்கள் மூலம் அரசு போக்குவரத்து கழகங்களின் நிதி நிலையைச் சீரமைக்க முடியும் என அதிகாரிகள் நம்பிக்கை தெரிவித்துள்ளனர். இந்த புதிய பார்சல் சேவை முயற்சி பயணிகள் மற்றும் வணிகர்கள் மத்தியில் பெரும் எதிர்பார்ப்பை ஏற்படுத்தியுள்ளது.