வார விடுமுறையை முன்னிட்டு  தமிழகம் முழுவதும் 1,635 சிறப்புப் பேருந்துகள் இயக்கம்!

வார இறுதி விடுமுறை நாட்களை முன்னிட்டுப் பொதுமக்கள் தங்களின் சொந்த ஊர்களுக்கு தடையின்றி பயணம் செய்ய வசதியாகச் சிறப்புப் பேருந்துகள் இயக்கப்படுகின்றன. சென்னையில் உள்ள முக்கிய பேருந்து நிலையங்கள் மற்றும் தமிழகத்தின் பிற நகரங்களில் இருந்து சிறப்புப் பேருந்துகள் இயக்கப்படும் என அரசு விரைவுப் போக்குவரத்துக் கழகம் தெரிவித்துள்ளது. வருகிற 24 (வெள்ளிக்கிழமை) மற்றும் 25 (சனிக்கிழமை) ஆகிய தேதிகளில் பயணிகளின் கூட்ட நெரிசலைத் தவிர்க்கும் பொருட்டு இந்தச் சிறப்பு ஏற்பாடுகள் செய்யப்பட்டுள்ளன. இதன்படி கிளாம்பாக்கம், கோயம்பேடு மற்றும் மாதவரம் ஆகிய பேருந்து நிலையங்களில் இருந்து பல்வேறு தென் மாவட்டங்களுக்குப் பேருந்துகள் இயக்க திட்டமிடப்பட்டுள்ளது.

சென்னை கிளாம்பாக்கத்திலிருந்து திருவண்ணாமலை, திருச்சி, மதுரை, திருநெல்வேலி, கோவை உள்ளிட்ட இடங்களுக்கு 24-ந் தேதி 395 பேருந்துகளும், 25-ந் தேதி 330 பேருந்துகளும் இயக்கப்படுகின்றன. அதேபோல கோயம்பேட்டிலிருந்து நாகை, வேளாங்கண்ணி, ஓசூர், பெங்களூரு ஆகிய இடங்களுக்கு இரண்டு நாட்களில் தலா 120 சிறப்புப் பேருந்துகள் இயக்கப்பட உள்ளன. மாதவரத்திலிருந்து கள்ளக்குறிச்சி, திருவண்ணாமலை மற்றும் புதுச்சேரிக்குத் தலா 25 சிறப்புப் பேருந்துகள் இயக்கப்பட திட்டமிடப்பட்டுள்ளது. மேலும் பெங்களூரு, திருப்பூர், ஈரோடு மற்றும் கோயம்புத்தூர் ஆகிய முக்கிய இடங்களிலிருந்தும் பல்வேறு பகுதிகளுக்கு 200 சிறப்புப் பேருந்துகள் இயக்கப்படவுள்ளன.

விடுமுறை முடிந்து ஞாயிற்றுக்கிழமை சொந்த ஊர்களில் இருந்து சென்னை மற்றும் பெங்களூரு திரும்ப வசதியாக 26-ந் தேதி 420 சிறப்புப் பேருந்துகள் இயக்கப்படுகின்றன. வார இறுதி நாட்களில் பயணிகளின் எண்ணிக்கை அதிகமாக இருக்கும் என்பதால் கடைசி நேர நெரிசலைத் தவிர்க்க முன்வர வேண்டும் எனப் போக்குவரத்துக் கழகம் கேட்டுக்கொண்டுள்ளது. பயணிகள் தங்களது பயணங்களை முன்னரே திட்டமிட்டு அதிகாரப்பூர்வ இணையதளம் அல்லது செயலி மூலம் முன்பதிவு செய்து கொள்ளுமாறு அறிவுறுத்தப்படுகிறார்கள்.