தமிழ்நாட்டிற்குக் காவிரி நீரைத் திறந்துவிடக் கோரி காவிரி நீர் மேலாண்மை ஆணையம் உத்தரவிட்டதற்கு எதிர்ப்பு தெரிவித்து, கர்நாடகாவில் வரும் ஆகஸ்ட் 13-ஆம் தேதி மாநில அளவிலான முழு அடைப்புப் போராட்டம் அறிவிக்கப்பட்டுள்ளது.

தமிழ்நாட்டிற்கு நாள் ஒன்றுக்கு 3,500 கனஅடி நீர் வீதம் அடுத்த 15 நாட்களுக்கு நீர் திறந்துவிட வேண்டும் என்று காவிரி நீர் மேலாண்மை ஆணையம் கர்நாடக அரசிற்கு உத்தரவிட்டது.

கர்நாடகாவில் போதிய நீர் இருப்பு இல்லாத சூழலில் தமிழ்நாட்டிற்குத் தண்ணீர் திறந்துவிடக் கூடாது எனக் கூறி, கன்னட வாடாள சங்கத் தலைவர் வாட்டாள் நாகராஜ் தலைமையில் கூடி போராட்ட முடிவை அறிவித்துள்ளனர். காலை 6 மணி முதல் மாலை 6 மணி வரை: ஆகஸ்ட் 13 அன்று காலை 6 மணி முதல் மாலை 6 மணி வரை இந்த முழு அடைப்புப் போராட்டம் நடைபெறவுள்ளது.

ஹோட்டல் உரிமையாளர்கள் சங்கம், லாரி மற்றும் ஆட்டோ ஓட்டுநர்கள் சங்கங்கள், வர்த்தக அமைப்புகள், திரைப்பட சேம்பர் மற்றும் பல்வேறு விவசாயச் சங்கங்கள் என 80-க்கும் மேற்பட்ட அமைப்புகள் இந்தப் போராட்டத்திற்குத் தங்கள் முழு ஆதரவை தெரிவித்துள்ளன.

பேருந்து போக்குவரத்து, வணிக வளாகங்கள், திரையரங்குகள் மற்றும் தனியார் போக்குவரத்துச் சேவைகள் இதில் பங்கேற்க உள்ளதால், அன்றைய தினம் கர்நாடகாவில் குறிப்பாகப் பெங்களூரு உள்ளிட்ட முக்கிய நகரங்களில் இயல்பு வாழ்க்கை பெருமளவில் பாதிக்கப்படும் என எதிர்பார்க்கப்படுகிறது.