தனியார் பள்ளிகளுக்கு அங்கீகாரம் வழங்க ரூ.100 கோடிக்கு மேல் லஞ்சம் வசூலித்த புகாரில் முன்னாள் பள்ளிக்கல்வித் துறை அமைச்சர் அன்பில் மகேஷ் பொய்யாமொழி கைது செய்யப்பட்டு சிறையில் அடைக்கப்பட்டுள்ள நிலையில், அவருடன் தொடர்புடைய தொழிலதிபர் வீட்டில் காவல்துறையினர் சோதனை நடத்தி வருகின்றனர்.

கடந்த ஆட்சிக் காலத்தில் தனியார் பள்ளிகளுக்கு நிரந்தர அங்கீகாரம் வழங்குவதற்காகக் 'கட்சி நிதி' என்ற பெயரில் ரூ.100 கோடிக்கும் மேல் வசூலித்ததாகத் தனியார் பள்ளிகள் சங்கம் சார்பில் புகார் அளிக்கப்பட்டது. இப்புகாரின் அடிப்படையில் முன்னாள் பள்ளிக்கல்வித் துறை அமைச்சர் அன்பில் மகேஷைச் சென்னை மத்திய குற்றப்பிரிவு காவல்துறையினர் நேற்று கைது செய்தனர்.

கைது செய்யப்பட்ட அவர், ஊழல் தடுப்புச் சிறப்பு நீதிமன்றத்தில் ஆஜர்படுத்தப்பட்டுப் புழல் மத்திய சிறையில் அடைக்கப்பட்டார். அவருக்கு முதல் வகுப்பு சிறை அறை ஒதுக்கப்பட்டுள்ளது. அன்பில் மகேஷ் தரப்பில் ஜாமீன் கோரி தாக்கல் செய்யப்பட்ட மனு நாளை விசாரணைக்கு வருகிறது. அதேவேளையில், அவரை 5 நாட்கள் காவலில் எடுத்து விசாரிக்கக் காவல்துறையினர் நீதிமன்றத்தில் மனு தாக்கல் செய்யத் திட்டமிட்டுள்ளனர்.

அன்பில் மகேஷ் மீதான ரூ.400 கோடி லஞ்சப் புகாரின் தொடர்ச்சியாக, அவருடன் தொடர்புடைய நபர்கள் மற்றும் வரவு செலவுகளைக் கண்காணிக்கும் வகையில் சென்னை பெருங்குடியில் உள்ள ராம்ஸ் ராகஸ்ரீ வில்லாஸ் அடுக்குமாடி குடியிருப்பில் வசிக்கும் தொழிலதிபர் சண்முகப்பிரியா என்பவரது வீட்டில் மத்திய குற்றப்பிரிவு போலீசார் சோதனையில் ஈடுபட்டுள்ளனர்.

இன்று காலை முதல் 10 பேர் கொண்ட போலீசார் குழுவினர் தொழிலதிபர் சண்முகப்பிரியாவின் வீட்டில் தீவிர ஆவணச் சரிபார்ப்பு மற்றும் ரெய்டு நடவடிக்கைகளை மேற்கொண்டு வருகிறது.

முன்னாள் பள்ளிக்கல்வித் துறை அமைச்சர் கைது செய்யப்பட்டு சிறையில் அடைக்கப்பட்டதும், அதைத் தொடர்ந்து தொழிலதிபர் வீட்டில் நடைபெற்று வரும் வருமான வரி/குற்றப்பிரிவு சோதனைகளும் தமிழக அரசியல் வட்டாரத்தில் பெரும் அதிர்வலைகளை ஏற்படுத்தியுள்ளன.