கோடை விடுமுறை முடிஞ்சாச்சு... சென்னை  வரும் விமானக் கட்டணங்கள் தாறுமாறு   உயர்வு! 

தமிழகத்தில் பள்ளி மற்றும் கல்லூரிகளுக்கான கோடை விடுமுறை முடிவடைவதையொட்டி, தங்களின் சொந்த ஊர்களுக்குச் சென்ற பொதுமக்கள் அனைவரும் தற்பொழுது சென்னைக்குத் திரும்பி வருகின்றனர். இதனால் சென்னை நோக்கி வரும் அனைத்து இரயில்கள் மற்றும் பேருந்துகளிலும் பயணியரின் கூட்டம் வழக்கத்தை விட மிகவும் நிரம்பிக் காணப்படுகிறது. தரைவழிப் போக்குவரத்தில் இடமில்லாததாலும், குறிப்பிட்ட நேரத்திற்குள் நகரை வந்தடைய முடியாத சூழ்நிலை உள்ளதாலும் பலர் வான்வழிப் பயணத்தைத் தேர்ந்தெடுத்து வருகின்றனர்.

இதனால் தென் மாவட்டங்கள் மற்றும் அண்டை மாநிலங்களில் இருந்து சென்னைக்குத் திரும்பும் விமானப் பயணிகளின் எண்ணிக்கையும் கணிசமாக அதிகரித்துள்ளது. பயணிகளின் இந்த அதீத தேவையைக் கருத்தில் கொண்டு, விமான நிறுவனங்கள் சென்னைக்கு வரும் விமானக் கட்டணங்களை நடப்பு வாரத்தில் பலமடங்கு உயர்த்தியுள்ளன. குறிப்பாகத் திருவனந்தபுரம் மற்றும் கொச்சி ஆகிய அண்டை மாநில விமான நிலையங்களில் இருந்து சென்னை வருவதற்கான கட்டணங்களும் தற்பொழுது உயர்த்தப்பட்டு உள்ளதாகத் தகவல்கள் தெரிவிக்கின்றன.

இதன்படி மதுரையில் இருந்து சென்னை வருவதற்கு விமானக் கட்டணமாக 17,303 ரூபாயும், கோவையில் இருந்து வருவதற்கு 16,504 ரூபாயும் வசூலிக்கப்படுகிறது. மேலும் திருச்சியில் இருந்து சென்னை வர 14,404 ரூபாயும், தூத்துக்குடியில் இருந்து வருவதற்கு 17,272 ரூபாயும் தற்பொழுது புதிய கட்டணமாக நிர்ணயிக்கப்பட்டுள்ளது. திடீரென உயர்த்தப்பட்ட இந்த விண்முட்டும் கட்டண உயர்வு, அவசரமாகச் சென்னை திரும்பத் திட்டமிட்டிருந்த நடுத்தரக் குடும்பத்து விமானப் பயணிகளிடையே பெரும் அதிர்ச்சியை ஏற்படுத்தியுள்ளது.