சென்னை பெரம்பூர் தொகுதிக்கு இன்று (ஜூலை 13) வருகை தந்துள்ள முதலமைச்சர் விஜய், அங்குப் புதிய சட்டமன்ற உறுப்பினர் அலுவலகத்தைத் திறந்து வைத்ததைத் தொடர்ந்து, அப்பகுதியில் புதிதாக அமைக்கப்பட்டுள்ள நியாயவிலைக் கடைக்கு நேரில் சென்று ஆய்வு மேற்கொண்டார். இந்தப் புதிய நியாயவிலைக் கடையில் பொதுமக்களுக்கான 'புதிய ஸ்மார்ட் ரேஷன் கார்டு' வழங்கும் திட்டத்தை முதலமைச்சர் விஜய் முறைப்படி தொடங்கி வைத்தார்.

குடும்ப அட்டைதாரர்களுக்கு விரல் ரேகை முறை மூலம் துல்லியமாகப் பொருட்கள் விநியோகிக்கப்படும் புதிய நடைமுறையை அவர் நேரில் பார்வையிட்டு, அதன் வேகம் மற்றும் செயல்பாடு குறித்து அதிகாரிகளிடம் கேட்டறிந்தார். திட்டத்தின் தொடக்கமாக, அந்தப் பகுதியைச் சேர்ந்த 10 எளிய குடும்பங்களுக்கு அரிசி, பருப்பு, சர்க்கரை உள்ளிட்ட அத்தியாவசிய ரேஷன் பொருட்களைத் தனது கைகளாலேயே வழங்கி விநியோகத்தைத் தொடங்கி வைத்தார்.

ரேஷன் பொருட்கள் வாங்க வந்திருந்த பொதுமக்களிடம், தற்பொழுது பொருட்களின் தரம் எவ்வாறு உள்ளது, கடைகள் சரியான நேரத்திற்குத் திறக்கப்படுகிறதா மற்றும் விநியோகத்தில் ஏதேனும் குறைபாடுகள் இருக்கிறதா என்பது குறித்து முதலமைச்சர் விஜய் நேரடியாகக் கலந்துரையாடினார்.

முதலமைச்சரே நேரடியாக ரேஷன் கடைக்கு வந்து தங்களுக்குப் பொருட்களை வழங்கியதைக் கண்ட அப்பகுதி மக்கள் நெகிழ்ச்சியடைந்தனர். இந்த ஆய்வின் போது கூட்டுறவு மற்றும் உணவுத்துறை அதிகாரிகள் பலரும் உடனிருந்தனர்.