சென்னை தலைமைச் செயலகத்தில் உள்ள மாநாட்டு அரங்கில், தமிழகப் பொதுப்பணித்துறையின்  தற்போதைய செயல்பாடுகள் மற்றும் புதிய திட்டங்களின் முன்னேற்றம் குறித்த முக்கிய ஆய்வுக் கூட்டம் இன்று முதலமைச்சர் விஜய் தலைமையில் நடைபெற்றது. தமிழகத்தில் புதிய அரசு பொறுப்பேற்றதைத் தொடர்ந்து, உள்கட்டமைப்பு மற்றும் மக்கள் நலத்திட்டங்களை விரைவுபடுத்தும் நோக்கில் இந்த ஆலோசனைக் கூட்டம் கூட்டப்பட்டது.

முதலமைச்சர் விஜய் முன்னிலையில் நடைபெற்ற இந்த ஆய்வுக் கூட்டத்தில், பொதுப்பணித்துறை அமைச்சர் ஆதவ் அர்ஜுனா, பொதுப்பணித்துறை முதன்மைச் செயலாளர் செல்வராஜ், மற்றும் துறையின் தலைமைப் பொறியாளர்கள், உயர்மட்ட அதிகாரிகள் எனப் பலர் கலந்து கொண்டனர்.

தமிழகத்தில் உள்ள வரலாற்றுச் சிறப்புமிக்க பழமையான அரசு அலுவலகங்கள் மற்றும் பாரம்பரியக் கட்டிடங்களை அவற்றின் தொன்மை மாறாமல் பாதுகாப்பது மற்றும் சேதமடைந்த பகுதிகளைத் துரிதமாகப் புதுப்பிப்பது குறித்து விரிவாக விவாதிக்கப்பட்டது. தமிழக வரலாற்றில் முத்திரை பதித்த தலைவர்கள் மற்றும் தியாகிகளைப் பெருமைப்படுத்தும் வகையில், மாநிலத்தின் பல்வேறு பகுதிகளில் கட்டப்பட்டு வரும் புதிய மணிமண்டபங்களின் கட்டுமானப் பணிகளைத் தொய்வின்றி விரைந்து முடிக்குமாறு அதிகாரிகளுக்கு முதலமைச்சர் அறிவுறுத்தினார்.

பல்வேறு மாவட்டங்களில் கட்டப்பட்டு வரும் புதிய அரசு மருத்துவமனைகள், நீதிமன்றக் கட்டிடங்கள் மற்றும் மாவட்ட ஆட்சியர் அலுவலகங்களின் கட்டுமானத் தரம் மற்றும் காலக்கெடு குறித்தும் இக்கூட்டத்தில் ஆய்வு செய்யப்பட்டது.

பொதுப்பணித்துறையின் கீழ் செயல்படுத்தப்படும் அனைத்துத் திட்டங்களையும் எவ்விதத் தாமதமும் இன்றி, தரக் கட்டுப்பாட்டு விதிகளுக்கு உட்பட்டு, நிர்ணயிக்கப்பட்ட காலத்திற்குள் முடித்து மக்கள் பயன்பாட்டிற்குக் கொண்டு வர வேண்டும் என அமைச்சர் மற்றும் அதிகாரிகளுக்கு முதலமைச்சர் விஜய் இந்த ஆய்வுக் கூட்டத்தில் திட்டவட்டமாக உத்தரவிட்டுள்ளார்.