சென்னை கோவளத்தில் விறுவிறுப்பாக நடைபெற்று வந்த தவெக மற்றும் அதன் தோழமைக் கட்சிகளின் முதல் ஆலோசனைக் கூட்டம் நிறைவடைந்துள்ளது. இக்கூட்டத்திற்குப் பிறகு செய்தியாளர்களைச் சந்தித்த மதிமுக முதன்மைச் செயலாளர் துரை வைகோ, புதிய ஆளும் கூட்டணியின் பெயர் குறித்த முக்கிய விபரங்களைப் பகிர்ந்துகொண்டுள்ளார். 2026 சட்டமன்றத் தேர்தல் வெற்றிக்குப் பிறகு, ஆளும் கூட்டணியில் உள்ள காங்கிரஸ், விசிக, மதிமுக மற்றும் ஐயூஎம்எல் ஆகிய கட்சிகளின் தலைவர்கள் பங்கேற்ற இந்த முதலாவது கூட்டத்தில் பல்வேறு முக்கிய அரசியல் முடிவுகள் எடுக்கப்பட்டுள்ளன.

செய்தியாளர்கள் சந்திப்பில் புதிய கூட்டணியின் பெயர் குறித்துக் கேட்கப்பட்ட கேள்விக்குத் துரை வைகோ பதிலளிக்கையில், தேர்தலுக்குப் பிந்தைய தவெக தலைமையிலான இந்த புதிய ஆளும் கூட்டணிக்கான பெயரை முதலமைச்சர் விஜய் ஏற்கனவே ஆலோசித்து முடிவு செய்து வைத்துள்ளார். அதற்கான அதிகாரப்பூர்வ அறிவிப்பை முதலமைச்சரே மிக விரைவில் முறைப்படி வெளியிடுவார்.

தமிழகத்தில் நிலவி வரும் பிரிவினைவாத அரசியல் மற்றும் கோடிக்கணக்கான ரூபாய் கைமாறும் பண அரசியலுக்கு, தவெக எம்.எல்.ஏ-விடம் ரூ.35 கோடி பேரம் பேசிய வழக்கில் எடுக்கப்பட்டுள்ள  நடவடிக்கைகள் மூலம் முதலமைச்சர் விஜய் முற்றுப்புள்ளி வைத்துள்ளார். திமுக மற்றும் அதிமுக ஆகிய இரு திராவிடக் கட்சிகளும் தங்களது உட்கட்சிப் பூசல்களிலும், சட்ட ரீதியான வழக்குகளிலும் தவித்து வரும் தற்போதைய சூழலில், தவெக கூட்டணி தங்களது முதல் கூட்டுப் பிரகடனத்தை நோக்கி நகர்ந்துள்ளது.

இன்றைய கூட்டத்தில் தோழமைக் கட்சிகளுக்கிடையேயான சுமுகமான உறவை நீட்டிப்பது, மக்கள் நலத் திட்டங்களை விரைந்து செயல்படுத்துவது மற்றும் மதச்சார்பற்ற கொள்கைகளை வலுப்படுத்துவது குறித்து விரிவாக விவாதிக்கப்பட்டுள்ளது. கூட்டணிக் கட்சிகளின் முழுச் சம்மதத்துடன் முதலமைச்சர் விஜய் தேர்வு செய்துள்ள அந்த புதிய பெயர் என்னவாக இருக்கும் என்ற எதிர்பார்ப்பு தற்பொழுது தமிழக அரசியல் வட்டாரங்களில் தொற்றிக்கொண்டுள்ளது.