நாளை தமிழக முதல்வர் விஜய், காவிரி ஆற்றின் குறுக்கே கர்நாடக அரசு கட்டத் திட்டமிட்டுள்ள மேகதாது அணை விவகாரம் தொடர்பாகப் பிரதமர் நரேந்திர மோடியை நேரில் சந்தித்துப் பேசுவதற்காக டெல்லி செல்ல உள்ளதாகத் தகவல்கள் வெளியாகியுள்ளன.

கர்நாடகத் தரப்பில் இத்திட்டத்திற்கு அனுமதி கோரி அழுத்தம் கொடுக்கப்பட்டு வரும் சூழலில், தமிழகத்தின் காவிரி நீர் உரிமையையும் டெல்டா விவசாயிகளின் வாழ்வாதாரத்தையும் பாதுகாக்கும் வகையில் முதலமைச்சரின் இந்த டெல்லி பயணம் பெரும் முக்கியத்துவம் வாய்ந்ததாகப் பார்க்கப்படுகிறது.

கர்நாடக மாநிலம் மைசூரில் அண்மையில் நடைபெற்ற நிகழ்ச்சியில் பிரதமர் நரேந்திர மோடி முன்னிலையில் பேசிய கர்நாடக முதலமைச்சர் டி.கே. சிவகுமார், மேகதாது அணை திட்டத்திற்கு வனத்துறை மற்றும் சுற்றுச்சூழல் அனுமதிகளை வழங்குமாறு கோரிக்கை விடுத்திருந்தார். இதற்குத் தமிழக அரசியல் கட்சிகளும் விவசாய அமைப்புகளும் கடும் எதிர்ப்புத் தெரிவித்து வருகின்றன.

இந்நிலையில், மேகதாது விவகாரத்தில் தமிழக அரசின் உறுதியான நிலைப்பாட்டையும் எதிர்ப்பையும் நேரடியாகப் பதிவு செய்யும் விதமாக, முதலமைச்சர் விஜய் நாளை டெல்லிக்குச் செல்லத் திட்டமிட்டுள்ளார். டெல்லி பயணத்தின் போது பிரதமர் நரேந்திர மோடியை நேரில் சந்திக்கும் முதலமைச்சர் விஜய், 67.15 டிஎம்சி கொள்ளளவு கொண்ட மேகதாது அணைத் திட்டத்திற்கு மத்திய நீர்வளத்துறை மற்றும் சுற்றுச்சூழல் அமைச்சகங்கள் எவ்விதச் சட்டப்பூர்வ அல்லது நிர்வாக அனுமதியையும் வழங்கக் கூடாது எனத் திட்டவட்டமாக வலியுறுத்த உள்ளார்.

காவிரி நடுவர் மன்ற இறுதித் தீர்ப்பு மற்றும் உச்சநீதிமன்றத்தின் 2018-ஆம் ஆண்டு தீர்ப்பின்படி, கீழ்ப்படுகை மாநிலமான தமிழ்நாட்டின் முழுமையான ஒப்புதல் இல்லாமல் காவிரியின் குறுக்கே கர்நாடக அரசு எவ்விதப் புதிய அணைகளையும் கட்ட முடியாது என்பதைத் தமிழக அரசு தொடர்ந்து சுட்டிக்காட்டி வருகிறது.

முன்னதாக, மேகதாது அணை அமையவுள்ள இடத்தில் மத்திய அரசு அதிகாரிகள் ஆய்வு மேற்கொண்டதாக வெளியான தகவல்களுக்குக் கடும் ஆட்சேபம் தெரிவித்து, பிரதமர் மோடிக்கு முதலமைச்சர் விஜய் அண்மையில் விரிவான கடிதம் எழுதியிருந்தார். அதில், பற்றாக்குறை நீர் ஆண்டான 2026-27-ல் தமிழக விவசாயிகள் ஏற்கனவே கடும் சிரமத்தில் உள்ள நிலையில், இத்தகைய ஆய்வுகள் அவர்களிடையே பெரும் அச்சத்தை ஏற்படுத்துவதாகக் குறிப்பிட்டிருந்தார்.

கர்நாடகாவிற்கு எவ்வித அனுமதியும் வழங்கக் கூடாது எனத் தமிழக சட்டமன்றத்தில் ஒருமனதாகத் தீர்மானம் நிறைவேற்றப்பட்டுள்ளதோடு, உச்சநீதிமன்றம் மற்றும் தேசிய பசுமைத் தீர்ப்பாயத்திலும் தமிழக அரசு சார்பில் வழக்குகள் தொடரப்பட்டுச் சட்டப் போராட்டம் முன்னெடுக்கப்பட்டு வருகிறது.

மேகதாது அணை கட்டப்பட்டால் தமிழகத்திற்கு இயல்பாகக் கிடைக்க வேண்டிய சுமார் 80 டிஎம்சி மழைநீர் தடுக்கப்பட்டு, காவிரி டெல்டா பகுதிகள் பாலைவனமாக மாறும் அபாயம் உள்ளதாகத் தமிழக அரசியல் தலைவர்கள் எச்சரித்துள்ளனர். இவ்விவகாரத்தில் அனைத்துக் கட்சிக் கூட்டத்தைக் கூட்டித் தமிழகத்தின் ஒட்டுமொத்த எதிர்ப்பையும் வெளிப்படுத்த வேண்டும் என எதிர்க்கட்சிகள் வலியுறுத்தி வரும் நிலையில், முதலமைச்சர் விஜய்யின் இந்த டெல்லி பயணம் அரசியல் மற்றும் விவசாய வட்டாரங்களில் மிகுந்த எதிர்பார்ப்பை ஏற்படுத்தியுள்ளது.