தமிழக முதலமைச்சரும் தவெக தலைவருமான விஜய் இன்று கரூர் மாவட்டத்தில் மேற்கொள்ளும் பிரம்மாண்ட அரசு முறைப் பயணம் மற்றும் மக்கள் சந்திப்பு நிகழ்வுகளையொட்டி, மாணவர்களின் பாதுகாப்பினை முன்னிட்டுப் பாதையின் அருகமைந்துள்ள 3 பள்ளிகள் மற்றும் ஒரு கல்லூரிக்கு இன்று தற்காலிக விடுமுறை அறிவிக்கப்பட்டுள்ளது.

முதலமைச்சரின் கரூர் வருகைக்கான பாதுகாப்பு மற்றும் பயண முன்னேற்பாடுகள் மாவட்ட நிர்வாகத்தால் தீவிரப்படுத்தப்பட்டுள்ளன.  சென்னையில் இருந்து காலை 9.20 மணிக்குத் தனி விமானம் மூலம் புறப்படும் முதலமைச்சர் விஜய், சரியாகக் காலை 10:30 மணிக்குத் திருச்சி சர்வதேச விமான நிலையத்தைச் சென்றடைகிறார்.

திருச்சியில் சிறப்பான வரவேற்பைப் பெற்ற பின், அங்கிருந்து சாலை மார்க்கமாகக் கார் மூலமாகப் புறப்பட்டுக் கரூர் மாவட்ட எல்லையை வந்தடைகிறார். முதலமைச்சர் விஜய் கரூரில் லட்சக்கணக்கான மக்களைச் சந்திக்கும் பிரம்மாண்ட ரோடு ஷோ (Road Show) மற்றும் அரசு நலத்திட்ட விழாக்களில் பங்கேற்க உள்ளார்.

முதலமைச்சர் பேரணியாகச் செல்லும் முக்கியப் பாதையான கரூர் - கோவை சாலையில் சுமார் 10 கிலோமீட்டர் தூரத்திற்கு இருபுறமும் இரும்புத் தடுப்புகள் அமைக்கப்பட்டுப் பலத்த பாதுகாப்பு ஏற்பாடுகள் செய்யப்பட்டுள்ளன. இந்த வரலாற்றுப் பேரணியில் சுமார் 5,000-க்கும் மேற்பட்ட முக்கியப் பிரமுகர்கள் மற்றும் கட்சித் தொண்டர்கள் நேரிடையாகப் பங்கேற்க உள்ளனர்.

முதலமைச்சரின் வருகையையொட்டி கரூர் - கோவைச் சாலையில் பல்லாயிரக்கணக்கான மக்கள் திரளுவார்கள் என்பதால், பள்ளி மற்றும் கல்லூரிக்குச் செல்லும் மாணவ, மாணவிகளின் பாதுகாப்பைக் கருத்தில் கொண்டு மாவட்ட நிர்வாகம் முக்கிய உத்தரவைப் பிறப்பித்துள்ளது. அதன்படி, இந்த ரோடு ஷோ நடக்கும் சாலையின் மிக அருகில் அமைந்துள்ள 3 பள்ளிகள் மற்றும் 1 கல்லூரிக்கு இன்று ஒருநாள் மட்டும் அவசர விடுமுறை அளிக்கப்பட்டுள்ளது.

முதலமைச்சரின் கார் அணிவகுப்பு செல்லும் போது பொதுமக்களுக்குத் தேவையற்ற போக்குவரத்து நெரிசல்கள் ஏற்படாத வண்ணம், நகரின் முக்கியப் போக்குவரத்துப் பாதைகளை மாற்றி அமைத்துப் போக்குவரத்துப் பிரிவு போலீசார் நெரிசல்களைச் சீரமைத்து வருகின்றனர்.