உலக சாதனை... அமெரிக்காவை பின்னுக்கு தள்ளி முதலிடம் பிடித்த சீனாவின் சூப்பர் கம்ப்யூட்டர்கள்! 

உலகப் புகழ்பெற்ற கணினி வல்லுநர்கள் அடங்கிய "டாப்500” என்ற சர்வதேச அமைப்பு, விண்வெளி மற்றும் தொழில்நுட்பத் துறையை உற்றுநோக்கும் வகையில் உலக நாடுகளின் அதிவேக சூப்பர் கம்ப்யூட்டர்கள் தரவரிசைப் பட்டியலை தற்பொழுது அதிகாரப்பூர்வமாக வெளியிட்டுள்ளது. ஜெர்மனியில் நடைபெற்ற சர்வதேச சூப்பர் கம்ப்யூட்டிங் மாநாட்டில் வெளியிடப்பட்ட இந்த புதிய தரவரிசைப் பட்டியலில், வல்லரசு நாடான அமெரிக்காவை பின்னுக்குத் தள்ளிச் சீன நாட்டின் அதிநவீன கணினித் தொழில்நுட்பம்  முதலிடத்தைப் பிடித்துப் புதிய வரலாற்றுச் சாதனை படைத்துள்ளது.

சீனாவின் ஷென்சென் நகரில் உள்ள தேசிய சூப்பர் கம்ப்யூட்டிங் மையத்தில் மிகச் சிறப்பாக நிறுவப்பட்டிருக்கும் 'லைன்ஷைன்' என்ற அதிநவீன கம்ப்யூட்டர், வினாடிக்கு 2 குவின்டில்லியனுக்கும் அதிகமான வேகத்தில் கணக்கீடுகளைச் செய்து இந்த முதலிடத்தை   தன்வசப்படுத்தியுள்ளது. இதுநாள் வரை உலக அளவில் மிக அதிவேக கணினியாக முதலிடத்தில் உலா வந்த அமெரிக்காவின் "எல் கேபிடன்" என்ற கணினியை விட, சீனாவின் இந்த புதிய 'லைன்ஷைன்' கணினியானது 20 சதவீதம் கூடுதல் வேகம் கொண்டது எனத் தரவுகள் தெரிவிக்கின்றன.

அமெரிக்கா விதித்த பல்வேறு கடுமையான தொழில்நுட்பத் தடைகளையும் மீறி, சீனா முழுக்க முழுக்கத் தனது உள்நாட்டிலேயே வடிவமைக்கப்பட்ட இயங்குதளத்தைப் பயன்படுத்தி இந்த  கணினியை உருவாக்கியுள்ளதுதான் உலக நுகர்வோர் மற்றும் விஞ்ஞானிகள் மத்தியில் பெரும் வியப்பை ஏற்படுத்தியுள்ளது. கடந்த 2017ம் ஆண்டுக்குக் பிறகு சீனா இந்த உலகளாவிய பட்டியலில் மீண்டும் முதலிடத்தைப் பெற்றுள்ள இந்த விபரம்  சர்வதேசத் தகவல் தொழில்நுட்ப வலைத்தளங்கள் மற்றும் ஊடகங்களில் முதன்மைச் செய்தியாகப் பகிரப்பட்டுப் பெரும் பரபரப்பைக் கிளப்பியுள்ளது.