காமன்வெல்த்தில் குவியும் பதக்கங்கள்... குத்துச்சண்டை போட்டியில் 10 பிரிவுகளில் இறுதிச் சுற்றுக்குத் தகுதி பெற்று இந்திய வீரர்கள் சாதனை!

2026 காமன்வெல்த் விளையாட்டுப் போட்டிகளில் இந்தியக் குத்துச்சண்டை வீரர்கள் அபாரத் திறமையை வெளிப்படுத்தி, 10 வெவ்வேறு எடைப் பிரிவுகளின் இறுதிச் சுற்றுக்குத் தகுதி பெற்று தங்களது பதக்க வேட்டையை உறுதி செய்துள்ளனர்.

மகளிர் 70 கிலோ எடைப் பிரிவு அரையிறுதிப் போட்டியில், இந்திய வீராங்கனை அருந்ததி சௌத்ரி, நடப்பு சாம்பியனான வேல்ஸின் ரோஸி எக்கிள்ஸை 4-0 என்ற கணக்கில் வீழ்த்தி அதிர்ச்சி அளித்தார். போட்டியின் முதல் இரண்டு சுற்றுகளில் அருந்ததியின் வலுவான தாக்குதலால், வேல்ஸ் வீராங்கனையை நடுவர் 'ஸ்டாண்டிங் கவுன்ட்' செய்ய வேண்டிய கட்டாயம் ஏற்பட்டது.

ஒலிம்பிக்கில் பதக்கம் வென்ற லவ்லினா, துவாலுவின் தாஃபாகியைத் தனது கூர்மையான காலடி அசைவுகள் மற்றும் கச்சிதமான பஞ்ச்களால் வீழ்த்தி 5-0 என்ற கணக்கில் ஒருமனதாக வெற்றி பெற்றார்.

உலக சாம்பியனான ஜெய்ஸ்மின், லெசோதோ வீராங்கனைக்கு எதிராகத் தீவிர ஆதிக்கம் செலுத்தினார். இரண்டாவது சுற்றின் இறுதியில் எதிராளி மூன்றாவது முறையாக 'ஸ்டாண்டிங் கவுன்ட்' பெற்றதை அடுத்து, நடுவர் போட்டியை நிறுத்தி ஜெய்ஸ்மின் வெற்றி பெற்றதாக அறிவித்தார்.

நரேந்தர் (90+ கிலோ): ஆடவர் பிரிவில் டிரினிடாட் மற்றும் டொபாகோவின் நைஜல் பாலுக்கு எதிரான போட்டியில் முழு ஆதிக்கம் செலுத்தி, 5-0 என்ற புள்ளி கணக்கில் அபார வெற்றி பெற்று இறுதிப்போட்டிக்கு முன்னேறினார். ஆடவர் 55 கிலோ அரையிறுதியில் நமீபியாவின் ஹாவோசெப்பை 5-0 என்ற கணக்கில் தோற்கடித்துத் தங்கப் பதக்கப் போட்டிக்குத் தகுதி பெற்றார். இவர்களுடன் சேர்ந்து மேலும் பல இந்திய குத்துச்சண்டை வீரர்கள் தங்களது இறுதிப் போட்டிகளை உறுதி செய்துள்ளனர்.

பிரீத்தி பவார் (மகளிர் 54 கிலோ), சாக்ஷி சௌத்ரி (மகளிர் 51 கிலோ), பிரியா கங்காஸ் (மகளிர் 60 கிலோ), அங்குஷ் பங்கல் (ஆடவர் 80 கிலோ) என இந்திய அணிக்கு ஒரே நாளில் 10 இறுதிச் சுற்று வாய்ப்புகள் கிடைத்துள்ளது, குத்துச்சண்டை அரங்கில் இந்தியப் வீரர்களின் ஆதிக்கத்தைப் பறைசாற்றியுள்ளது.