நாமக்கல்லில் பரபரப்பு... காதலிக்க மறுத்த கல்லூரி மாணவியின் வீட்டருகே 80 அடி உயர செல்போன் டவரில் ஏறி மாணவர் தற்கொலை மிரட்டல்!

 

சக கல்லூரி மாணவி தனது ஒருதலைக் காதலை ஏற்க மறுத்ததால் மனமுடைந்த 21 வயது கல்லூரி மாணவர், அம்மாணவியின் வீட்டிற்கு அருகே உள்ள 80 அடி உயர செல்போன் கோபுரத்தில் ஏறித் தற்கொலை செய்து கொள்ளப் போவதாக மிரட்டல் விடுத்த சம்பவம் நாமக்கல்லில் பெரும் பரபரப்பை ஏற்படுத்தியது.

ஈரோடு சென்னிமலை சாலையில் அமைந்துள்ள தனியார் கல்லூரி ஒன்றில் பயின்று வருபவர் சூர்யமூர்த்தி (21). இவர் அதே கல்லூரியில் பயின்று வரும் நாமக்கல் பகுதியைச் சேர்ந்த சக மாணவி ஒருவரை ஒருதலையாகக் காதலித்து வந்துள்ளார். தனது காதலை அம்மாணவியிடம் தெரிவித்தபோது, அவர் அதனை ஏற்க திட்டவட்டமாக மறுத்துவிட்டதாகக் கூறப்படுகிறது.

மாணவி காதலை நிராகரித்ததால் விரக்தியும் மன உளைச்சலும் அடைந்த சூர்யமூர்த்தி, நேற்று மாலை ஈரோட்டில் இருந்து நேரடியாக நாமக்கல்லில் உள்ள அம்மாணவியின் வீட்டுப் பகுதிக்குச் சென்றுள்ளார். அங்குப் பேச்சுவார்த்தை பலனளிக்காத நிலையில், ஆத்திரமடைந்த அவர் அருகிலிருந்த சுமார் 80 அடி உயர செல்போன் டவரில் விறுவிறுவென ஏறி உச்சியில் நின்று கொண்டு கீழே குதித்துத் தற்கொலை செய்து கொள்ளப் போவதாக மிரட்டல் விடுத்தார்.

இளைஞர் ஒருவர் செல்போன் டவரின் உச்சியில் நின்று தற்கொலை மிரட்டல் விடுப்பதைக் கண்ட அப்பகுதி பொதுமக்கள் அதிர்ச்சியடைந்து உடனடியாகக் காவல்துறையினருக்கும் தீயணைப்புத் துறையினருக்கும் தகவல் கொடுத்தனர்.

தகவலறிந்து விரைந்து வந்த நாமக்கல் போலீசார் மற்றும் தீயணைப்புத் துறை வீரர்கள், கீழே பாதுகாப்பு வலைகளை விரித்துத் தயார் நிலையில் வைத்தனர். பின்னர், டவரில் ஏறி சூர்யமூர்த்தியிடம் சாதுரியமாகப் பேச்சுவார்த்தை நடத்தி, அவரைச் சமாதானப்படுத்தி எந்தவித அசம்பாவிதமும் இன்றிப் பாதுகாப்பாகக் கீழே இறக்கினர்.

இதனைத் தொடர்ந்து, பொது அமைதிக்குப் பங்கம் விளைவித்தல் மற்றும் தற்கொலை முயற்சி உள்ளிட்ட பிரிவுகளின் கீழ் சூர்யமூர்த்தி மீது நாமக்கல் போலீசார் வழக்குப்பதிவு செய்து விசாரணை நடத்தி வருகின்றனர்.

தற்கொலை எதற்கும் தீர்வல்ல. மன அழுத்தம் அல்லது உணர்ச்சிவசப்பட்ட சூழல்களில் ஏற்படும் தற்கொலை எண்ணங்களிலிருந்து விடுபடத் தமிழக அரசின் உதவி எண்களைத் தொடர்பு கொள்ளலாம். மாநில தற்கொலை தடுப்பு உதவி மையம்: 104 (24 மணி நேரமும் செயல்படும்) சினேகா தற்கொலை தடுப்பு உதவி மையம்: 044 - 24640050