தவெக-வுக்கு ஆதரவுக்கரம் நீட்டிய கம்யூனிஸ்ட்கள்...   சு.வெங்கடேசன் பளிச்! 

தமிழகத்தில் நிலவும் அரசியல் குழப்பங்களுக்கு மத்தியில், தமிழக வெற்றிக் கழகம் ஆட்சி அமைக்க இந்திய கம்யூனிஸ்ட் (CPI) மற்றும் மார்க்சிஸ்ட் கம்யூனிஸ்ட் (CPM) ஆகிய இரு கட்சிகளும் நேற்று (மே 8) அதிரடியாகத் தங்களது ஆதரவைத் தெரிவித்துள்ளன. இந்தத் திடீர் அரசியல் மாற்றத்திற்குப் பின்னால் மார்க்சிஸ்ட் கம்யூனிஸ்ட் கட்சியின் நாடாளுமன்ற உறுப்பினர் சு.வெங்கடேசன் மிக முக்கியப் பங்காற்றியுள்ளதாகத் தகவல்கள் வெளியாகியுள்ளன. இரு கம்யூனிஸ்ட் கட்சிகளையும் விஜய்யின் பக்கம் திருப்பியதில் இவரது பேச்சுவார்த்தைகள் பெரும் வெற்றியைப் பெற்றுள்ளன.

முன்னதாக, சு.வெங்கடேசன் எழுதிய வரலாற்றுச் சிறப்பான ‘வேள்பாரி’ புதினத்தைத் திரைப்படமாக உருவாக்கும் முயற்சியில் தவெக தலைவர் விஜய் நீண்ட நாட்களாக அவருடன் நெருங்கிய தொடர்பில் இருந்தார். அந்தக் காலகட்டத்தில் உருவான இவர்களது நட்பு, தற்போது அரசியல் களத்திலும் ஒரு புதிய கூட்டணியைத் தோற்றுவிக்கத் தூண்டுகோலாக அமைந்துள்ளது. சினிமாவைத் தாண்டி அரசியல் ரீதியாகவும் சு.வெங்கடேசன் விஜய்க்கு வழங்கிய ஆலோசனைகளே, தற்போது கம்யூனிஸ்ட் கட்சிகளின் ஆதரவைப் பெற அடித்தளமாக அமைந்ததாகக் கூறப்படுகிறது.

இந்த ஆதரவின் மூலம் விஜய்யின் தவெக ஆட்சி அமைப்பதற்கான வாய்ப்புகள் தற்போது பிரகாசமாகியுள்ளன. திராவிடக் கட்சிகளுக்கு மாற்றாக ஒரு புதிய வலிமையான கூட்டணியை உருவாக்கக் கம்யூனிஸ்ட் கட்சிகளும் ஆர்வம் காட்டி வரும் வேளையில், சு.வெங்கடேசனின் இந்த நகர்வு தமிழக அரசியலில் ஒரு மைல்கல்லாகப் பார்க்கப்படுகிறது. வேள்பாரியில் தொடங்கிய இந்தத் தொடர்பு, இன்று கோட்டையை நோக்கி விஜய்யை அழைத்துச் செல்லும் ஒரு முக்கிய அரசியல் சக்தியாக உருவெடுத்துள்ளது குறிப்பிடத்தக்கது.