ஆதிதிராவிடர் மற்றும் பழங்குடியினருக்கு 2 நாட்களில் புதிய சாதி சான்றிதழ்... மத்திய அரசு காலக்கெடு நிர்ணயம்! 

ஆதிதிராவிடர் மற்றும் பழங்குடியின மக்களுக்குச் சாதிச்சான்றிதழ் வழங்குவதில் நிலவி வந்த தேவையற்றக் காலதாமதங்களைத் தவிர்க்கும் பொருட்டு, சமூக நீதி மற்றும் அதிகாரமளித்தல் துறை புதிய அதிரடி வழிகாட்டு நெறிமுறைகளை வெளியிட்டுள்ளது. இந்த புதிய உத்தரவின்படி ஆதிதிராவிடர் (SC) வகுப்பைச் சேர்ந்த மக்களுக்கு விண்ணப்பித்த 2 நாட்களுக்குள்ளும், பழங்குடியினர் (ST) வகுப்பைச் சேர்ந்த மக்களுக்கு ஒரு வாரத்திற்குள்ளும் சாதிச்சான்றிதழ் வழங்கப்பட வேண்டும் எனக் கெடு விதிக்கப்பட்டுள்ளது. அரசின் சலுகைகள் மற்றும் கல்வி வாய்ப்புகளை உரிய நேரத்தில் பெறுவதற்குச் சான்றிதழ்கள் மிக அத்தியாவசியமாக இருப்பதால், இந்த நடைமுறையை உடனடியாகச் செயல்படுத்த அறிவுறுத்தப்பட்டுள்ளது. சான்றிதழ் கோரும் எளிய மக்களின் நலனைக் கருத்தில் கொண்டு, அதிகாரிகளின் அலட்சியப் போக்கைக் கட்டுப்படுத்த இந்த புதிய காலக்கெடு நிர்ணயிக்கப்பட்டுள்ளது.

விண்ணப்பதாரர்களின் சான்றிதழ்களை எவ்விதக் காரணமுமின்றி நிலுவையில் வைக்கக் கூடாது என்றும், தகுதியான நபர்களுக்குக் குறிப்பிட்ட காலத்திற்குள் சாதிச்சான்றுகளை உடனுக்குடன் வழங்க வேண்டும் என்றும் அதிகாரிகளுக்குக் கடுமையான உத்தரவு பிறப்பிக்கப்பட்டுள்ளது. குறிப்பாகப் பழங்குடியின மக்களுக்கான சான்றிதழ் விசாரணைகளை விரைந்து முடித்துத் தடங்கலின்றிச் சான்று வழங்கக் கேட்டுக்கொள்ளப்பட்டுள்ளனர். விண்ணப்பங்களின் மீது எடுக்கப்படும் நடவடிக்கைகளை உயர் அதிகாரிகள் தொடர்ந்து கண்காணிக்க வேண்டும் என்றும் அறிவுறுத்தப்பட்டுள்ளது. அரசின் இந்த நேரடி வழிகாட்டுதல்கள் மூலம் சான்றிதழ் கோரி நீண்ட காலம் அலைக்கழிக்கப்படும் அவல நிலைக்கு முற்றுப்புள்ளி வைக்கப்பட்டுள்ளது.

நிர்ணயிக்கப்பட்ட காலக்கெடுவுக்குள் சான்றிதழ் வழங்காமல் தேவையற்றக் காலதாமதம் செய்யும் வருவாய்த்துறை அதிகாரிகள் மீது துறைரீதியான கடுமையான நடவடிக்கைகள் பாயும் என எச்சரிக்கப்பட்டுள்ளது. சம்பந்தப்பட்ட அதிகாரிகளின் அலட்சியம் கண்டறியப்பட்டால் அவர்கள் மீது உரிய ஒழுங்கு நடவடிக்கைகள் எடுக்கப்படும் என சுற்றறிக்கையில் தெளிவுபடுத்தப்பட்டுள்ளது. மத்திய சமூக நீதி மற்றும் அதிகாரமளித்தல் துறையின் இந்த அதிரடி உத்தரவு ஆதிதிராவிட மற்றும் பழங்குடியின மக்களிடையே பெரும் வரவேற்பைப் பெற்றுள்ளது.