தமிழகத்தில் புதிதாகப் பொறுப்பேற்றுள்ள முதலமைச்சர் விஜய் தலைமையிலான தவெக அரசாங்கத்தில், கூட்டணி உருவாக்கம் மற்றும் தகுதிநிலை குறித்த விவாதத்தில் விசிக மற்றும் காங்கிரஸ் கட்சித் தலைவர்களிடையே ஏற்பட்டுள்ள நேரடி வார்த்தை மோதல் தமிழக அரசியல் வட்டாரத்தில் பரபரப்பை ஏற்படுத்தியுள்ளது.

சமூகச் சீர்திருத்தவாதி இரட்டைமலை சீனிவாசனின் நினைவு நாளான நேற்று, சென்னையில் அவரது நினைவிடத்தில் அஞ்சலி செலுத்திய பின் செய்தியாளர்களைச் சந்தித்த விசிக தலைவர் தொல். திருமாவளவன், தவெக உடனான உறவு குறித்து ஒரு புதிய விளக்கத்தை முன்வைத்தார்.  தவெக அரசுக்குத் தொடக்கத்தில் விசிக வெளியில் இருந்து மட்டுமே ஆதரவு அளித்தது என்றும், பெரும்பான்மையை நிரூபிக்க முதலமைச்சர் விஜய் கோரியதால், 10 நாட்களுக்குப் பிறகே விசிக அமைச்சரவையில் இணைந்தது என்றும் கூறினார்.

கடந்த ஜூலை 1ம் தேதி முதலமைச்சர் விஜய் தலைமையில் நடைபெற்ற ஆலோசனைக் கூட்டத்தில் ஒருங்கிணைப்புக் குழு மற்றும் பொதுச் செயல்திட்டம் குறித்து விவாதிக்கப்பட்டதே தவிர, எந்த இறுதி முடிவும் எடுக்கப்படவில்லை. எனவே, தவெக தலைமையில் ஒரு முறையான, அரசியல் கூட்டணி இன்னும் முழு வடிவம் பெறவில்லை என்பதே இதன் பொருள் எனத் தெரிவித்தார். மேலும், தற்போதும் தங்களுக்கு திமுகவுடனான பிணைப்பு நீடிப்பதாகக் குறிப்பிட்ட அவர், விசிக முன்னாள் எம்.எல்.ஏ-வை திமுக தங்கள் பக்கம் இழுத்ததே தங்களுக்குப் பேரதிர்ச்சியாக அமைந்தது என்றும் விமர்சித்திருந்தார். 

திருமாவளவனின் இந்த விசித்திரமான "கூட்டணி இல்லை" என்ற கருத்திற்குத் தமிழ்நாடு காங்கிரஸ் கமிட்டி தலைவர் மாணிக்கம் தாகூர் உடனடியாக எதிர்ப்பைப் பதிவு செய்துள்ளார்.

"அரசியல் என்பது தொலைக்காட்சியில் நடக்கும் ஏதோ ஒரு விளையாட்டு நிகழ்ச்சி அல்ல. சட்டமன்றத்தில் ஒரு அரசுக்கு ஆதரவளித்து, அந்த அரசின் அமைச்சரவையிலும் பங்கெடுத்துக் கொண்ட பிறகு, நாங்கள் வெளியில் இருந்து மட்டுமே ஆதரவு தருகிறோம், இன்னும் அதிகாரப்பூர்வக் கூட்டணி அமையவில்லை என்று வார்த்தைகளால் விளையாட வேண்டிய அவசியமில்லை. அமைச்சரவையில் இருக்கும் போதே நீங்கள் அந்தக் கூட்டணியின் முழுமையான அங்கமாகி விடுகிறீர்கள். இதில் தேவையற்ற குழப்பங்களுக்கு இடமில்லை" என்று மாணிக்கம் தாகூர் காரசாரமாகப் பதிலடி கொடுத்துள்ளார்.

2026 சட்டமன்றத் தேர்தலில் எந்தக் கட்சிக்கும் தனிப் பெரும்பான்மை கிடைக்காத நிலையில், திராவிட மற்றும் தேசியக் கட்சிகளை ஓரங்கட்டித் தவெக தலைமையில் காங்கிரஸ், விசிக, மதிமுக மற்றும் இஸ்லாமிய நிறுவனங்கள் இணைந்து தமிழ்நாட்டின் முதல் கூட்டணி அரசாங்கத்தை அமைத்துள்ளன.

இந்நிலையில் ஆட்சி அமைந்து 50 நாட்களைக் கடந்துள்ள நிலையில், தவெக அரசின் முக்கியக் கூட்டணித் தலைவர்களான திருமாவளவன் மற்றும் மாணிக்கம் தாகூர் இடையே பொதுவெளியில் வெடித்துள்ள இந்த முரண்பாடு முதலமைச்சர் விஜய்க்குப் புதிய தலைவலியை ஏற்படுத்தியுள்ளது.

அதே நேரத்தில் தவெகவின் மூத்த அமைச்சர் புஸ்ஸி ஆனந்த், பாமக தலைவர் அன்புமணி ராமதாஸுடன் நெருக்கம் காட்டி வரும் நிலையில், விசிக மற்றும் இடதுசாரிகள் தங்களது அதிருப்தியை வெளிப்படுத்தத் தொடங்கியுள்ளனர். இந்த உள்கூட்டணி மோதல்கள் குறித்து மதிமுக பொதுச்செயலாளர் வைகோ அதிருப்தி தெரிவித்ததுடன், மாற்றுக் கருத்துக்களை ஊடகங்களில் பேசாமல் முதலமைச்சரிடம் நேரிடையாகப் பேசித் தீர்க்க வேண்டும் என அறிவுறுத்தியுள்ளார். வரவிருக்கும் 7 சட்டமன்றத் தொகுதிகளுக்கான இடைத்தேர்தல் நெருங்கி வரும் வேளையில், தவெக கூட்டணியில் நிலவும் இந்தச் சலசலப்புகளை எதிர்கட்சிகள் உன்னிப்பாகக் கண்காணித்து வருகின்றன.