புதுச்சேரி மாநில காங்கிரஸ் மற்றும் பாஜக ஆகிய இரு முக்கிய கட்சிகளும் தங்கள் தேர்தல் அறிக்கையை வெளியிட்டுள்ளன. காங்கிரஸ் தலைவர் மல்லிகார்ஜுன கார்கே மற்றும் மத்திய அமைச்சர் மன்சுக் மாண்டவியா ஆகியோர் முன்னிலையில் இந்த அறிவிப்புகள் வெளியாகின.

காங்கிரஸ் பேரியக்கம் புதுச்சேரி மக்களுக்காகப் பல்வேறு நலத்திட்டங்களை முன்வைத்துள்ளது.  அனைத்து குடும்ப அட்டைதாரர்களுக்கும் ரேஷன் கடைகள் மூலம் மாதந்தோறும் ரூ. 2,500 மதிப்பிலான மளிகைப் பொருட்கள் இலவசமாக வழங்கப்படும். முதலாம் வகுப்பு முதல் ஆராய்ச்சி கல்வி (Ph.D) வரை முழுக்க முழுக்க இலவசக் கல்வி வழங்கப்படும். 2029-ல் ராகுல் காந்தி பிரதமர் ஆனவுடன் புதுச்சேரிக்கு முழு மாநில அந்தஸ்து பெற்றுத்தரப்படும். ஏழைப் பெண்களின் திருமணத்திற்காக 'தாலிக்கு தங்கம்' வழங்கும் திட்டம் மீண்டும் செயல்படுத்தப்படும்.

பாஜக-வின் 'அன்பு தங்கை' மற்றும் நலத்திட்டங்கள். மத்தியில் ஆளும் பாஜக, புதுச்சேரிக்கென பிரத்யேகமான பல திட்டங்களை அறிவித்துள்ளது.  ஆண்டுக்கு 2 சிலிண்டர்கள் (பொங்கல் மற்றும் விநாயகர் சதுர்த்திக்கு) இலவசமாக வழங்கப்படும். 12-ம் வகுப்பு பொதுத்தேர்வில் சாதிக்கும் மாணவிகளுக்கு இலவச இ-ஸ்கூட்டர் வழங்கப்படும்.

பெண்களுக்கு இலவச ஆட்டோ ஓட்டுநர் பயிற்சி மற்றும் ஆட்டோ வாங்க ரூ. 50,000 மானியத்துடன் 'பிங்க் ஆட்டோ' திட்டம் தொடங்கப்படும். புதுச்சேரி இளைஞர்களுக்கு மாதம் ரூ. 10,000 உதவித்தொகையுடன் கூடிய இன்டர்ன்ஷிப் வாய்ப்புகள் உருவாக்கப்படும்.

சென்னை - புதுச்சேரி இடையே அதிவேக வந்தே மெட்ரோ ரயில் இயக்கப்படும். புதுச்சேரி ரயில் நிலையத்திற்கு 'மகாகவி பாரதியார்' பெயர் சூட்டப்படும். பி.எம்.கிசான் நிதி ஆண்டுக்கு ரூ. 9,000-ஆக உயர்த்தப்படும். குறு, சிறு பெண் விவசாயிகளுக்குக் கறவை மாடு அல்லது ஆடுகள் வழங்கப்படும்.